Hapoh u ne u bnai dawa ka DKWKRJ ban ithuh noh ïa ki Kur ba ai jait kmie ha Jaiñtia Hills

Jowai, K’Lyngkot 09: Ka Dorbar Ki Waheh Kur Ri Jaiñtia lyngba ka Executive Dorbar jong ka, ka la phah da ka jingthoh ba la soi da u President ma Khroo L Pariat kum u President bad u ma G. Bareh kum u General Secretary, sha u Chief Executive Member (CEM) ka Jaiñtia Hills Autonomous District Council (JHADC) ban pynkynmaw ïa ka Council ban ïoh ithuh noh ïa baroh ki kur kiba ai jait sha ka kmie kiba don hapoh u pud u sam jong ka JHADC.
Ha katei ka shithi la kyrpad ïa u CEM ma Thombor Shiwat bad ïa ka EC jong u, ban ithuh noh da ka aiñ ïa ki Kur kiba ai jait kmie, ïa ki Waheh Kur kumjuh ïa ki Seng ne ki Dorbor Kur baroh kiba don hapoh u pud ka JHDC, hapoh ka 31 tarik u Kyllalyngkot mynta ka snem.
Ha ka jingthoh la pynkynmaw ruh ïa u CEM ba ka Council lyngba ka Secretary jong ka EC ka la dep ban phah pynpoi ïa ki kyrteng jong ki Kur bapher bapher kiba don hapoh u pud u sam ka Council na ka bynta ban lum thup ïa ki bad ban ithuh ïa ki da ka Council. Kumjuh ruh na ka liang jong u CEM ula dep ban kular hakhmat jong ki Waheh Kur ïa kane ka jingithuh ïa ki Kur ki jait ba ai kur sha ka kmie ha ka jingïakynduh bad ka nongïalam Kur ha ka 12 tarik u Nailur 2025, kumjuh ruh ïa ka jingkren jong u CEM lyngba ki lad pathai khubor.
“Ka Dorbar ki Waheh Kur ka Ri Jaiñtia, ha ka jingtreikam ka lap ba kane ka jingbym ithuh bad pynskhem kloi da ka aiñ katkum ka khyrnit ba hynriew (6 Schedule) kumba la aibor da ka riti treikam ka ri lyngba ka JHADC, ka la buh mynta ha ka jingbym shngaiñ jong ki kur ba shim jait na ka kmie bad ka lawei jong ka jaitbynriew jong ngi kan sa sakma. Kumta ngi kyrmen ba ha kane ka sien kaba ngin kyrpad khatduh khadwai ïa ka EC hapoh ka jingïalam ba tbit jong phi kum u CEM, phin pynmih hukum noh hapoh katei ka tarik ba la kdew haneng. Ngi na ka Dorbar ki Waheh Kur ngim kwah ban shim da kawei pat ka sien jam ban pynbor ïa phi bad ïa ka EC JHADC,” la pynpaw ka Dorbar Kur.
Shuh shuh na ka liang ka Dorbar Kur ka pynpaw “Ngi kitbok kitrwiang ïa phi bad ïa ki dkhot ka EC ba une u snem ba thymmai phin dang lah ban shakri kham bha shuh shuh ban thaw aiñ katkum ka 6th Scheduled, ban ïada bad ai jingshngaiñ ïa ki Kur ki Jait ka Bei, ki jong ngi bad jong phi kiba pynlong ïa ka jaitbynriew kin phuh mut phuh mat ha baroh ki liang ha kane ka jylla, ka Ri India bad ka satlak pyrthei,” la pynkut ka Dorbar ki Waheh Kur.