Shillong, K’Lyngkot 09: Ïa u Bah Chaltbha Muksor ba la ïathuh ba ka jah uba dei u nongshong shnong na Lad Rymbai (Dong Pohktieh), East Jaiñtia Hills District, Meghalaya, ba la ïathuh ba la jah mynta la ïoh pat ka jingtip ba la shem bad uba la don ha ki lad jingïada bad la lap ïa u da kaba suk kaba saiñ.
U Bah Chaltbha uba la mih na la ka shnong ha ka 2 tarik mynta u bnai 2026 ha ka por kaba ym duna ïa ka 11:00 baje mynmiet ban leit sha Bengaluru na ka bynta ban leit bylla bad shong lyngba ka rel.
Ka khubor ba la ïathuh lyngba ka KSU la ong ba la ïohi khatduh ïa u ha Jolarpettai Junction Railway Station, Tamil Nadu, kaba dei ruh ha ka 5 tarik mynta u bnai, 2026 ha ka por kaba ym duna 6:00 baje mynstep, bad hadien kane ym lah shuh ban kynduh ban ïoh ïakren naba ka mobile phone jong u ka la jah bad la switched off.
Hadien ka jingïawad kaba la pyrshang da baroh ïa u Bah Chaltbha la shem ha Government Medical College and Hospital, Krishnagiri, Tamil Nadu. Kumba long mynta u la don hapdeng ka jingioh jingïada bad hapoh ka jingkhmih jong ka Khasi Students’ Union Bengaluru Unit.
Hadien ka jingïoh jingtip na ka KSU West Jaiñtia Hills Unit bad ki dkhot jong ka ïing ba la ïathuh ba ula jah ha Tamil, ka KSU Bengaluru Unit ka la sdang ban sam bad pyntip paidbah lyngba ki dur bad lyngba ka social media ha kylleng jong ka Bengaluru bad Tamil Nadu. Hadien na ka liang jong ka Krishnagiri Police Station ka la pyntip ïa u Donboklang Nongphud, President, KSU Bengaluru Unit, bad pyntip ba ïa u Bah Chaltbha Muksor la lap bad la phah sumar ha Government Medical College and Hospital, Krishnagiri, ha ka 8 tarik mynta u bnai, 2026 ha ka por 3:00 baje nohphai sngi, ong ka kyrwoh ba la phah da ka seng, Khasi Students’ Union (KSU), Bengaluru Unit.
