Mawlai Games : Rah ka Mawdatbaki bad Iewrynghep ha ka Basketball, yn pynhap pyrda noh mynta ka sngi

Shillong, K’Lyngkot 09 : Ka Mawlai Games & Literary Fest 2026 kan pynhap pyrda noh ïa ka lympung ïalehkai ka jong ka mynta ka sngi ka 10 tarik u Kyllalyngkot 2026 ha Iew Nonglum ha ka por 4 baje janmiet.
Ha kane ka sngi ban pynhap pyrda yn pynbna ruh ïa ka Shnong kaba long ka lahduh ha kane ka lympung ïalehkai lem bad kaba wan ba ar bad ka Best Discipline lem bad kiwei kiwei ki khusnam shimet.
Ha ka jingïalehkai kaba lah long ha la sngi kaba 6 jong kane ka lympung, la lah ban pyndep ïa ka Semi Final jong ka Football bad ka Final jong ka Basketball jong ki kynthei bad shynrang.
Ha ka Semi Final jong ka Football, ka Mawdatbaki ka lah pynliem noh ïa ka Mawiong Umjapung da 3-1 bad ka Syllaikariah ka la jop ïa ka Nongkwar da 2-1. Ka jingïalehkai Final kan long mynta ka sngi ha ka por 9 baje mynstep ha madan phutbol jong ka SAI ha NEHU.
Ha ka Final jong ka Basketball ki kynthei, ka Mawdatbaki ka long ka lahduh hadien ba ka la jop ïa ka Nonglum da 41 la 33 point katba ha ki liang ki shynrang pat ka Iewrynghep ka la jop ïa ka Mawiong Umjapung da 56 la 29 point.
Ha kane ka sngi la ïadonlang i BDO ka Mawlai C&RD Block, i Kong D. Lyngdoh kum i Kongsan bad iba la sam ruh ïa ki takma bad ki certificate sha ki lahduh.