Shillong, Naitung, 08: Ka Executive Committee jong ka Khasi Hills Autonomous District Council (KHADC) ka la rai ban phah tohkit halor ka jingbym don ka dulir ba la thied ïa ka jaka jong ka Council ha ka shnong Mawkyrwat, South West Khasi Hills District ha u snem 2014.
U Chief Executive Member (CEM) jong ka Khasi Hills Autonomous District Council (KHADC) u Bah Titosstarwell Chyne haba jubab ïa ka jingkylli ba la warah da u MDC ka Mawkyrwat Constituency u Bah Carnes Sohshang ha kaba ïadei bad ka jingthied jaka ha Mawkyrwat, u la ong ha u snem 2014 ka Council ka la thied ïa ka jaka hynrei ki Dulir kim don satia ha ophis.
U Bah Chyne u la pynsngew ruh hapoh ka Dorbar Lyiur jong ka Ïingdorbar Thawaiñ ka KHADC kaba la long ha ka sngi Thohdieng ba ïa ka Dulir ba la shu Xerox la wan ai sha ophis ha u snem 2015 ha ka por ba dang long CEM u Bah PN Syiem bad kane ka jingthoh la lap ba ka KHADC ka ladep ban thied ïa ka jaka ha Mawkyrwat.
U la ïathuh ba ïa kane ka jaka ba la thied ha u snem 2014 ka dei ha ka por ba dang long CEM u Bah Ardent Miller Basaïawmoit ha kaba u la soi ha ka Dulir ïa thied khyndew hynrei kane ka Dulir kam don satia ha ka opohis treikam jong ka KHADC.
Halor kane, u la ong ba ka EC kan sa thung da ka jingtohkit.
U la ïathuh ba ka Dulir kaba la ïoh Xerox ka paw ba ka KHADC ka ladep ban siew ïa ka pisa T.35,25,039 bad ka jingheh jong kane ka jaka ka long 11,750.13 phut sawdong.
“Ha u snem 2015, ka KHADC ka la shim ïa ka jaka ha Rangmaw ba la ai ei da ka jingkular ba ka KHADC kan thung kam ïa ar ngut na ka longiing kaba la ai ïa kane ka jaka bad ka KHADC ka ladep ban leh ïa kane katkum ka jingïateh kular. Hynrei ha kaba ïadei bad pat bad ka jaka ha Mawkyrwat, ophis kan sa thung ïa ka kynhun tohkit ban lap ïa ka jingshisha baroh bad ka Council kan sa pynkhreh ban shimti ïa ka jaka,” la pynshai u CEM hapoh ka Ïingdorbar.
