Nongpoh, Naitung 08: Hadien baka samoi treikam jong ki nongkitkam ba rim kala kut noh, ka Ri-Bhoi Youth Federation (RBYF) mynta ka sngi kala pynthymmai biang ïaki nongkitkam ka Umsning Circle, ban jied thymmai ïaki nongïalam lyngba ka jingthep vote kaba la long ha Umsning bala wan ruh ban shim bynta da ki nongïalam bad ki dkhot jong ki Unit bapher bapher ba hap ha katei ka circle bala pynïaid da ka election Committee jong ka seng.
Ha katei ka jingjied ïaki nongïalam ba thymmai u Samla Balakmen Nongbri u la shah jied kum u President, u Samla Breggie Sun Secretary, Shining star Thangkhiew Vice President, Gershom Lymphuid Organizing Secretary, Henry Marngar Publicity Secretary, Iai Kyrsian Office Secretary bad kiwei kiwei bala pynskhem syndon ha katei ka sngi da u Bah RB Shadap uwei naki nongïalam barim ka seng bala don bynta ruh ban seng ïaka RBYF.
La sakhi ruh ha katei ka sngi da ka jingdonlang u Bah Rocky Kylla Chairman ka Umsning Town Dorbar, Bah Rocky Marweiñ Rangbah Shnong ka Umsning Proper B, ka kong Mardilet Kharnaior President ka Seng Kynthei Umsning Pyllun, u Bah Bipul Thangkhiew President ba rangbah jong ka seng RBYF, ki nongïalam ka Central Body bad kiwei kiwei.
Haba kren ha katei ka sngi naka liang u Bah RB Shadap bad kitei ki riew rangbah kila ai ka jingïaroh ïaka seng RBYF kum kawei naki seng trai ri ba mih na Ri-Bhoi District ka dei ka seng kaba ki paidbah ki dang don ka jingshaniah khaamtam ban peit ïaka eh ka shon jong ki paidbah haka district bad ban rat diengkhong ïaki kam sniew kam smeh bad ki jingdih buaid ha kane ka juk ba mynta ba bun naki khun samla kila ngop khamtam u drok.
Kila ai ruh ka jingkyntu kynpham ïa kitei ki dkhot bad ki nongïalam ba thymmai ba kin trei hok ïaka kam kumba la bynshet haki, ym ban shim kabu ha kyrteng jong ka seng, ba kin long ruh ki nuksa sha kiwei pat ki khun samla ban ïalam naka bynta ka ri bad ka jaitbynriew.
