Jot rathai ka surok Ladrymbai-Jalyiah By pass

Khliehriat naitung 8: Ka Jaiñtia students Movement Eastern Region, ka kyntu jur ïa ka tnat Public Works Department (Roads) N.E.C Khliehriat ba kan sngewbha ban maramot noh ïa ka surok Ladrymbai-Jalyiah By Pass kaba pyniasoh bad ka shnong Mookhep, namar kane ka surok mynta kaba la jot rathai na ka daw ba ka tnat PWD ka khlem maramot shuh mynta la bun snem naduh ba sdang ban shna ïa kane ka surok.
Ha kaba ïadei bad kane ka seng myn ha ka 27 tarik u jylliew ka la phah da ka jingthoh sha u Executive Engineer jong ka tnat P.W.D (Roads) N.E.C Khliehriat bad katkum katei ka shithi ba la soi da u President JSM-ER, u samla Wellson.R.D.Siangshai, ka seng ka la pynpaw ka jingsngew khia halor ka jingsniew palat kane ka surok By pass kaba la bun sa tang ki thliew ki syar kiba dap da ka um ktieh hapdeng surok bad ong ruh ba ka tnat ba dei peit ka la shu leh klet ïa kane ka surok namar naduh ba shna ïa kane ka surok ym shym la don shuh kano kano ka jingmaramot na ka liang ka tnat.
La ong ruh ba kane ka surok ka long kaba donkam bha namar ki paidbah ka thaiñ ki ïaid na kane ka surok haba ki donkam ban leit shim dawai na ka PHC Pamrapaithlu, kumjuh ruh kali heh ruh ki ju ïaid na kane ka by pass namar kane ka surok ka pynïasoh bad ka national highway ha Mookhep bad ha shi lynter kane ka surok ki don ruh ki shnong bad ki dong bapher bapher kiba ju ïaid na kane ka surok.
Ïa ka shithi ba la phah sha u Executive Engineer ka P.W.D (Roads) Khliehriat, ka seng ka la phah copy ruh sha u Deputy Commissioner ka East Jaiñtia Hills District, u Abhilsah Banarwal, IAS bad na ka liang u Abhilash Banarwal ruh khlem da pynslem, myn ha ka 29 tarik u jylliew u la phah da ka jingthoh sha u Executive Engineer ka tnat P.W.D.Roads Khliehriat bad bthah ïa ka tnat ba kan leh ïa kaba donkam kata ban maramot noh ïa katei ka surok Ladrymbai-Jalyiah By pass kaba la jot rathai kumba la pynpaw da ka seng JSM-ER