Ka Vitamin-C ka long kawei napdeng ki vitamin kaba kynsai ha ka koit ka khiah. Kam lah satia ban pynkoit na ka jingshitom kum ka jingpang king baïongkhlieh bad jingshietmet lane ka flu, hynrei ka dei kaba lah pat ban pynjanai bad aibor ïa ka met ban ïaleh pyrshah kine ki jingpang. Ki katto katne napdeng kiba bun ki jingmyntoi ba ngi lah ban ïoh na ka Vitamin-C ki kynthup ka jinglah ban aibor ïa ka bor met.
Ka ïada na ka jingpang kaba ktah ïa ki khmat, ka jingransti ka sniehdoh bad kiwei. Ki jingbam ba riewspah ka Vitamin-C ki kynthup ki soh bad ki jhur ki dei kiba lah ban pynbiang halor ka jingdonkam ka met ïa kane ka vitamin. Bad lada biang ka jingbam kine ki soh lane ki jhur, hynrei ka rukom im ba jur than ka shongsuk, ka jingdih sikret bad jur ka lyer jaboh ki lah ban long ka daw halor ka jinghap ban dih ki dawai nutrient na ka bynta ka vitamin C bad D napdeng kiwei de.
Ki dawai vitamin bad mineral kim lah satia ban bujli na ka jingjied ki jingbam ba tei, ka jingkilan met bad ka jingdon ka jingmut kaba bha. Hynrei lada don bynta ha ka jingjied ki jingbam ba tei, ka jingkilan met manla ka sngi bad ka jingshimkhia na ka bynta ïalade, ka dei kaba lah ban treikam borbah ha kane ka jingpynrung kine ki vitamin bad mineral.
Ki jingmyntoi ha ka liang ka koit ka khiah na ka Vitamin C : Ka long kaba donkam ban khmih janai halor ki nutrient na ka bynta ka jingtei ka bor met, ka koit ka khiah bad ka jingpynbiang ki jingdonkam ha ka met. Kane ym tang ba ka ai jingmyntoi halor ka bha ka miat ka bor met hynrei ka dei kaba lah ruh ban ïarap ban ïakhun pyrshah kiba bun ki jingpang kum ka baïongkhlieh, ka flu bad lah ban koit kloi na ki jingpang. Ka Vitamin C ka long kawei napdeng ki nutrient kaba lah ban ïarap ha kane ka liang.
Ka jingsuhkhriat : Ka jingpynthikna halorka jingdon ka vitamin C kam dei kaba lah ban pynkoit na ka suhkhriat, hynrei ka dei kaba lah ban pynduna ki jingshah ktah na kane ka jingshitom. Kumta lada phi mad kane ka jingshitom phi lah ban jied ban bam da u sohmylleng, sohjew bad ka ngap, bad ki soh citrus kum u soh ñiamtra. U sohkynphor, sohsaw, broccoli bad u kubri ki long napdeng kiwei pat ki thymmei halor ka jinglah ban shalan ka vitamin C.
Ka jingransti ka sniehdoh : Lada phi sakhi halor ka jingransti kloi ka sniehdoh, ka long kaba donkam ban pynjur ka jingpynrung ka vitamin C. kane ka vitamin ka dei kaba lah ban pynduna ka jinglong thoh lain bad ransti jong ka sniehdoh bad ka pynduna ruh ka jinglong tyrkhong. phi lah ruh ban kynthup da ka vitamin c ha ki jingtah khmat jongphi.
Ka jingheh jingsan jong ki tissue ha ka met : Ka Vitamin C ka dei kaba la ju tip ruh kum ka ascorbic acid bad ka dei kaba donkam halor ka jingheh jingsan ka jingmaramot na ka bynta baroh ki tissue ha ka met. Ka dei kaba don bynta ha kiba bun ki rukom treikam hapoh ka met kynthup ka jingthaw bad pynlong ki collagen, ka jingkjit ka iron, ka jingpynkoit ki jingmong, ka jingpynneh ka koit ka khiah jong ki khyrkhoit, ki shyieng bad ki bniat.
Ki Antioxidants : Ka jingpynrung ka Vitamin C ka dei kaba lah ban shalan hapoh ka met ki antioxidant kiba lah ban ai jingïada ïa ka met na ka jingshah ktah ha ki phlia jakhlia.
