Shillong, K’Lyngkot 04 : Ka jingpyntrei ïa ka surok Fourlane naduh Umshyrpi ter ter haduh Pomlum ha ka Phase -1 watla ka la ïaid stet ha u bnai Naiwieng – Nohprah jong u snem ba la dep hynrei kiba bun ki paidbah ki buh ka jingkylli la ka jingpyntrei ïa kane ka projek ka lah neem ban dep noh mynta u bnai Kyllalyngkot.
Lah ban kdew hangne ba ha ka jinghiar jurip jong u Symbud Myntri Rangbah ka Jylla Bah Prestone Tynsong dang shen ïa ka jingpyntrei ïa kane ka projek naduh Umshyrpi ter ter haduh Dawki, na ka liang ka kompeni kaba pyntrei ka la kular ba ïa kane ka Phase -1 kin pyrshang ban pyndep noh ha u Nohprah 2025.
Ha kane ka jingjurip na ka liang u Symbud Myntri Rangbah u la ong ruh ba shwa u Snem Thymmai ki paidbah kin sa ïoh ban pyndonkam noh da ka surok ba thymmai. Hynrei na ka liang ki riew paidbah ki la pynpaw ba watla ki la don bun ki jaka ba ki la ïoh ban ïaid na surok ba thymmai hynrei ki dang hap ban mad ïa ka dheng kali tang shu poi ki bynta na 3Mer ter ter sharum namar bym pat dep ka jingkieng thymmai ha Umshyrpi.
“Naduh Upper Shillong ka leit ka wan ka la sngewtynnad namar ba la ïoh ban ïaid ar tylli ki kali na kajuh ka liang, hynrei tang shu poi kham sharum 3 Mer la hap ban mad biang ïa ka dheng kali namar ka jingbym pat dep ka jingkieng thymmai ha Umshyrpi,” ong uwei na ki nongñiah kali kamai.
Na ka liang ki katto katne ngut ki riew rangbah pat ki la ong ba lada ka kompeni ka lah ban pyndep noh mynta u bnai ïa ka jingkieng bad ïa ki katto katne ki bynta jong ka surok kiba dang sah lehse kan long ka jingkyrkhu kaba khraw ïa ki paidbah kiba leit ba wan man ka sngi na katei ka surok.
“Ngi khmih lynti ba la kumno kumno shwa ban poi ka aiom long skul baroh ka jingtrei kan dep lut khnang ba ka dheng kali kan kut noh,” ki la ong.
Dang ha ka 01tarik u Nohprah jong u snem ba la dep u Symbud Myntri Rangbah u la ong, “Na ka liang u contractor jong ka package -1 u la kular ba ïa kane ka surok yn pyndep hapoh ka 31tarik jong u Nohprah, 2025. Haoid ka jingpyndep pura lut kan shim por kumba 15 -20 sngi ei ei hynrei kata kam lei lei. Kaba nga kwah ka long ba ki paidbah kin ïohi ba ka jylla jongngi kan ïaid shaphrang khamtam kane ka fourlane kaba la angnud da ki phew snem mynta kan sa urlong noh naduh Umshyrpi haduh Pomlum kan dep nadong shadong hapoh ka 31tarik Nohprah.”
