Da ka Phlim “Ha Lyngkha Bneng” la plie pyrda ïa ka Jaffna International Cinema Festival

Shillong, Kyllalyngkot 4: Ka phlim kaba pawnam ha rilum Khasi bad kaba ïakren ruh da ka ktien Khasi kala rah ïa ka nam ka jylla Meghalaya sha ka rynsan ka pyrthei namar kane ka phlim ba la thaw bad pynwan dur da u Bah Pradip Kurbah kaba u la jer kyrteng “Ha Lyngkha Bneng” – The Elysian Field la pyni paidbah ha Sri Lanka, Jaffna International Cinema Festival, kaba plie pyrda ïa ka tamasa kaba 11, ha ka 30 tarik u Nohprah.
Ha ka jingpyni ïa ka phlim ha Jaffna Thiruvalluvar Cultural Centre, ka phlim kala pyni ïa ka jingeh jingjynjar bad ka jingïohi jngai ban ïaineh kaba la buh thong ha u snem 2047, ha kaba la im tang 6 ngut ki nongshong shong ha ka jaka kaba don ha kyndong bha. Lyngba ka jingjarjar, jingkynmaw bad ka jingsam lang ïa ka jingduh, u Bah Kurbah ula wad bniah ban lap ïa ka daw halor ka jingim jong kitei haba ka pyrthei baroh kawei kala jah rngai noh, ka jingmut kaba khlaiñ kaba don jingïadei bad ka imlang sahlang ha Meghalaya bad ka jingïadei kaba ïajan bha bad ka jaka bad ka kur ka jait.Ka Festival kan kut ha ka 4 tarik u Kyllalyngkot.
Ka Jaffna International Film Festival kadei ka rynsan ban wad bad ailad ïa ki phlim kiba kham pher ha ka rukom pynsngew ka jongki ha ki cinema. Ka thong hi ka long ban rakhe ïa ka cinema kaba laitluid ha ka dewbah, ryngkat bad ka thaw ïa ka rukom sngewthuh ïa ka kolshor jong kiwei, ban kyntiew ïa ka jingïajan bad ka jingïasngewthuh jingmut lyngba ka cinema. Ka festival ka kyntiew bad pynshlur ïa ki nongshna phlim kiba dang samla da kaba pyni ha ka sien nyngkong ïa ki phlim bad ïa ki phlim lyngkot.
Ka phlim “Ha Lyngkha Bneng” – The Elysian Field kala dep ban ïoh ïa ki khusnam ha ka rynsan ka pyrthei kaba la ai jingithuh ïa ka Meghalaya cinema. Ha ka Kolkata International Film Festival, ka phlim kala jop 3 tylli ki khusnam kaba kynthup ïa ka Best Film, Best Director ïa u Bah Kurbah. Hadien kane kala ïoh ïa ka NETPAC Award for Best Asian Film ha Moscow International Film Festival ha u snem 2025.
“Nga dap da ka jingsngewnguh ïa ka Jaffna bad ïa ka Jaffna International Cinema Festival. Ka jingplie ha katei ka miet ha Jaffna Thiruvalluvar Cultural Centre ka long kaba kyrpang da ka jingpyni ïa ka phlim ha ka ktien Khasi Ha Lyngkha Bneng – The Elysian Field ha ka 30 tarik u Nohprah 2025.
“Ka long kaba sngewieit ban ïohsngew shaphang u Sai Murali uba la pdiang sngewbha ïa baroh kiba don bynta ha ki kam shna phlim bad shaphang u Director ka Indian Council for Cultural Relations ha Sri Lanka kaba pyni ïa ka jingïadei kaba la neh slem jong ka jingïatreilang hapdeng ka ri India bad ka festival” la ong u Bah Kurbah.
Palat 200 tylli kila rung na ka ri India kaba la kylla long kum kaba heh duh na ki phlim na ki 17 tylli ki ri.Ha kane ka festival kala don ruh ka jingai burom ïa u nongshna phlim ba pawnam u Ritwik Ghatak.