Ba pynslem ka DoNER yn pyndep noh ïa ka surok Rongjeng-Mangsang-Adokgre da ka skhim na ka World Bank

Shillong, Kyllalyngkot 4 : U Myntri Rangbah ka Jylla Conrad K Sangma ula pynbna ha ka sngi Thohdieng, ba ka Sorkar kan sa shna pyndep noh ïa ka surok kaba la sahteng la slem jong ka Rongjeng-Mangsang-Adokgre lyngba ka skhim na ka World Bank. U la ïathuh ka daw ba slem ban pyndep ruh ka dei namar ka jingkyllaiñ palat ki skhim na ka tnad DoNER.
U Myntri Rangbah ula pynshai ba ka jingslem ban pyndep ïa kane ka project ka dei namar ka jinglong kyllaiñ, namar ki Sorkar barim ki la pan pyntreikam ïa kane ka surok na ki artylli ki skhim kiba hap hapoh ka Ministry of DoNER.
Kane ka project ba 200 klur tyngka ka la dei ban dep ha u 2020, hynrei, ka Ministry kala pynkut noh ïa kawei na ki skhim namar la aplai ïa ka ha ki artylli ki bynta jong kajuh ka Ministry.
“Ka Ministry of DoNER kala shem ba kane ka surok ka dei kaba la aplai ha ki arbynta na ki artylli ki skhim ba ïapher jong kajuh ka Ministry bad kumta, ïa kawei ka skhim lah hap ban pynsangeh noh” ong u Myntri Rangbah haba jubab ïa ki jingkylli na ki paidbah ha ka CM Connect ba long ha ka shnong Memilam, North Garo Hills.
U pyntip ba ha kine ki khyndiat snem bala leit, ka Sorkar kala ïatreilang bad ka Ministry of DoNER bad ka Ministry of Finance ban pynthikna ïa ka jinglah pyndep noh ïa kane ka surok ba kongsan kaba pynïasoh ïa ka North Garo Hills bad ka East Garo Hills.
“Ngi la ïohpdiang ïa ka jingmynjur ban pyndep noh ïa ka surok, ka ban sa bei tyngka da ka World Bank” ula bynrap.
Kane ka surok ba 44 km ka jingjrong ka dei u budlum jong ki nongshong shnong ka thaiñ bad kan ai jingmyntoi ïa kumba 50000 ngut ki briew na ki artylli ki constituency ka Kharkutta bad Rongjeng.
Katba 22 Km ka surok kan sdang na Rongjeng sha jan ka Nengkhram kala jan dep artad, hynrei bun ki bynta jong ka surok ki dang sahteng bad ba jynjar bha ban leit.
\ ïa kane ka surok la mang tyngka ha u snem 2017 ba kot haduh 210 klur tyngka, kaba la bei tyngka da ka NLCPR bad ka NEC. Hynrei ka NEC kala weng noh ïa kane ka project bad shim noh ia ka song pisa ba 88 klur tyngka ba kala mang, kaba la pynduna ïa ka mang tyngka jong ka project sha ka T.123 klur.
Hashuwa ba ka NEC kan weng noh ïa ka project, kiba bun ki bynta jong ka surok rim lah kyndang lut khnang ban ïoh shna da kaba thymmai.