Naba shakri ïa ka parish, pynkup burom ka St. Joseph’s Church Mawkhar ïa ki Lyngdoh Sohblei

Shillong K’ Lyngkot 04: Ka St. Joseph’s Church Mawkhar Parish ha ka sngi Saitjaiñ ka la pynlong ïa ka prokram pynkup burom ïa ki Lyngdoh Sohblei kiba la trei bad shakri ha ka parish naduh mynshwa bad kiba dang ai ïa ki jingshakri jong ki haduh mynta mynne.
Ïa kane ka prokram kaba dei ruh bad ka jingïaid lang bad ka Jubillee jingkyrmen, kaba dei ruh ban long ha u Nohprah jong u snem ba la dep, hynrei namar ka jingbun palat ki prokram na ka liang ka Parish Pastoral Council kam shym la lah ban pyndep ïa kane ka prokram ha utei u bnai.
Hapoh ka jingïalam jong u Parish Priest u Fr. Leo ?awbor parish priest bad u Rev Fr assistant Parish Priest u Fr Bensar Kharsati bad ka Parish Pastoral Council la pynlong ïa ka jinglehniam da kaba phuh baphieng bad ruh da ki prokram bapher bapher.
Ha kane ka sngi ki phadar kiba la shah pynkup burom ki long u Rev Fr Pascal Lyngdoh uba la ai ka jingkren, nangta u Chancellor ka Shillong Archdiocese u Rev Fr Jameris Shylla uba la pyn mynta ïa ka mass bakhuid, nangta u Rev Fr Robert Majaw, nalor ka jingdon lem ki sister, nangta ka jingrwai ba sngewtynnad jong ka Jubillee Choir bad kiwei kiwei pat ki prokram.
Lah ban ong ba na ka liang jong ka Parish ka la dep ban khot ïa baroh ki Lyngdoh Sohblei kiba la trei ha kane ka Parish, hynrei na ki daw bym lah kiar kiba bun kim shym la lah ban poi sha kane ka prokram, hynrei la poi tang 3 ngut ki phadar.
Lah ban pynkynmaw ba kane ka Jubilee of hope kadei kaba la buh da u Kpa Bakhuid ha u Nohprah jong u snem 2025 hynrei na ka daw jong ka jingbun palat ki prokram na ka liang ka Parish Pastoral Council jong ka Mawkhar Parish kim shym la lah satia ban pyndep, kumta ki la pynlong noh ha ka 3 tarik mynta u bnai.
Ha kane ka sngi na ka liang u MLA ka 17th North Shillong Constituency u Bah Adelbert Nongrum bad kiwei kiwei ki la wan ïashimbynta lang ha kane ka prokram.
La ïoh ruh ïa ki prokram kum ki jingrwai bad ki jingai sngewbha na ki committee bapher bapher kaba long kum ka dak ban pynphuh pynphieng ïa kane ka sngi.