Shah set jubor ki samla Khasi bad Garo ha Clinic, pyllait im ki Pulit Delhi bad KSU

Shillong, Naitung, 07: Ha ka sngi Palei dang saw tyngab ka bneng ki Pulit jong ka Nongbah Delh bad ki dkhot jong ka KSU Delhi Unit ki la ïoh ban pynlait ïa ki samla kiba la shah khang tala hapoh ka jaka ai dawai ha nongbah Delhi.
Ki Pulit bad ki dkhot ka KSU ki la leit sha ka jaka ba la set ïa kine ki samla ha ka por 3:00 baje mynstep bad la ïoh pyllait im ïa ki ha ka por 4:00 baje mynstep.
Ka KSU Delhi hapoh ka jingïalam jong u Vice President, u Samla Wallamkupar Nongsiej ha u kyrwoh khubor ka la ïathuh ba ka la ïoh jingujor na ki bahaïng ba arngut ki samla kynthei Khasi bad uwei u samla Garo ki la shah set ha kane ka jaka ai dawai.
Kine ki lai ngut ki la shah pynbor ban trei jubor hapoh kawei ka Ayurveda Clinic kaba la tip kyrteng kum ka Susmay Arogya Clinic kaba don ha Dilshad Garden, West Delhi wat hadien ba ki la mih noh na katei ka jaka ba ki trei.
Katkum ka jingujor ki bahaiing wat hadien ka jingmih noh jong ki na ka kam, ha ka 6 tarik mynta u bnai ha ka por 11:00 baje mynmit, u trai jong ka Clinic uba la tip kyrteng kum u Ashish u la phah leit shaw jubor ïa ki napoh ka PG kaba ki sah kaba don ha Shlimar Bagh.
Hadien ba la wan kit jubor la ïalam ïa ki shapoh Clinic ryngkat ka byrngem byrsit bad la thmu pynsah jubor ïa ki hapoh ka Clinic da kaba la khang tala syndon ïa ki baroh lai ngut hapoh ka Clinic.
Ka KSU Delhi Unit marmar ka la wad lad jingïarap na kylleng bad ha ryngkat ka jingïatreilang bad u Dr. Raghavendra, MLP Delhi bad ka jingïarap na ka SHO ka Seema Puri; Delhi Police la lah ban pyllait ïa kine ki lai ngut bad ïa pynbeit ïa kane kam haduh 4:00 baje mynstep.
Ka KSU ka pynrem jur ïa ka jingleh donbor bad ha kajuh ka por ruh ka seng ka kyntu ïa ki samla kynthei bad shynrang ba ki dei ban da thikna bad wad bñiah hashwa ba kin leit trei ïa kino ki kam kiba don hapoh nongbah Delhi.