Jowai, Nohprah 22: Ka Jaiñtia Hills District Chess Association (JHDCA) ha ryngkat ka jingïatreilang bad ka Jowai Cooperative Urban Bank Ltd, kum shi bynta ban rakhe ïa ka Golden Jubilee jong ka Bank kin pynlong ïa ka jingïakop ïalehkai Chess kaba la tip kum ka ‘2nd U Kiang Nangbah Jaiñtia Hills Chess Open Competition 2025’ haka 29 bad 30 tarik u Nohprah, 2025 ha Indoor Hall jong ka Ladthadlaboh Dorbar Shnong, Jowai.
Ïa kane ka jingïakob yn pynlong ha ki saw tylli ki kyrdan kata ka Open Category, Under-17, Under-12, bad Women Category. ïa ki nongjop yn sam da ka song pisa ha ryngkat ki syrnot bad ki khusnam.
Na ka bynta ka kyrdan Under-17 ki dei kiba la kha naduh ka 30 tarik u Nohprah, 2008 bad haka kyrdan Under-12 kin dei naduh ka 30 tarik u Nohprah, 2013. Ka bai rung ka long ?100 tang na ka bynta ka kyrdan Open Category.
Ka tarik ba khadduh ban pynrung kyrteng kan long haka 27 tarik u Nohprah, 2025 shwa ka por 6:00 PM. Kiba kwah ban ïashim bynta ki lah ban phone bad wad jingtip khambnaih ha u ma P. Lhuid (President) – 8974560098, ma H. Lyngdoh – 9862186065, lane ha u ma D. Bang – 8837212840.
Na ka liang ki nongpynïaid ki khmih lynti ba ki nongïashim na kylleng ka District kin wan shitrhem sha kane ka jingïakop, kum ka lad ban pynkiew ïa ka sap ka phong jong ki khun samla ka Rilum Jaiñtia haka jingïalehkai Chess.
