Shillong, Naitung 07 : Katba ka aiom jied nongmih khmat sha ka iingdorbar rhaw ain ka jylla ka la nangjan nangjan ka lyer elekshon MLA ha Mylliem constituency ruh ka la sdang shongshit bha khamtam hadien ba ki nongïalam ba ha khmat na kiwei ki party kynthup ki nongkyrshan jong u Bah Ronnie V Lyngdoh MDC ka Mylliem bad ruh ki nongkyrshan jong ka MDC barim ka Kong Teilinia Thangkhiew, ha ka 5 tarik Naitung ki la wan ai jingkyrshan noh ïa u Bah Hamletson Dohling, MLA ba mynta ka Mylliem constituency.
Kine ki nongïalam ki dei napoh ka thain Mylliem Them kaba kynthup ïa ki 15 tylli ki shnong.
Haba ai jingkren ha kane ka sngi, u Bah Hamletson u la pdiang sngewbha ïa ki nongïalam na baroh ar ki kynhun bad u la kyntu ruh ïa ki ba kin ïatreilang kum kawei ka kynhun ha kaban dang lah ban pynjanai shuh shuh ïa ki kam ki jam hapoh ki shnong ki thaw bad ha ka constituency hi baroh kawei.
U Bah Hamletson u la ong “Ha ki snem bad ki por ba la leit ngi la ïa ïaid la ka jong ka lynti hynrei hadien ba nga la jop kum u MLA nga la pyrshang ban trei ïa ki kam ki jong nga bad nga ngeit skhem ba ka jingwan kine ki nongïalam sha ka kynhun kam dei ba ki peit ïa nga kum u briew shimet hynrei ki peit bad ki ïohi ïa ki kam bad ïa ka mynsiem kaba nga don ban trei na ka bynta ka constituency.
Shuh shuh u la ong ruh “Hadien ba ki nongïalam jong kine ki arkynhun ki la wan bad kynduh ïa nga, nga la pdiang sngewbha ïa ki ban ïatrei bad kyrshan lang ïa ki kam kiba bun na bynta ka constituency bad nga la dap da ka mynsiem kaba sngewkmen eh bad nga ngeit skhem ba ka jingwan kyrshan ka jongphi kan long ka bor na ka bynta jongnga bad ba ngan dang lah ban trei arshah ban ïa kaei kaba nga trei mynta.
Kiwei kiba la ai jingkren ha kane ka sngi ki kynthup ïa u bah O Jyrwa na ka liang ki nongïalam ka Kong Teilinia Thangkhiew bad u bah P Khonglam na ka liang ki nongïalam u Bah Ronnie V Lyngdoh bad kiwei kiwei.
