Thaw ka sorkar da ka National Games Secretariat ban pynkhreh ïa ka National Games ba 39 ha jylla

Shillong, Nohprah 20 : Ka Kynhun Myntri ha ka sngi Thohdieng, ka la ai jingmynjur ban thaw da ka National Games Secretariat Society, ka kynhun treikam kaba la bynshet ban plan bad pynkhreh ïa ka National Games ba 39 , kaba lah buh ban pynlong hangne ha ka jylla Meghalaya ha u snem 2027.
Haba kren sha ki lad pathai khubor hadien ba wai ka jingïalang ka kynhun Myntri, u Myntri Rangbah Conrad K Sangma ula ong “Ngi la rai ban thaw, ïa ka National Games Secretariat Society, bad ïa kane la leh ban pynkhreh ïa ka National Games ba 39 ka ban long ha Meghalaya”.
“Kane ka dei ka lynti kaba la ju leh da baroh ki Jylla ban pynthikna ba dei ban don ka kynhun ba treikam laitluid ka ban pyntreikam bad pynthikna ïa ka jinglah pynlong ïa ka Games kaba jop. Ka dei kum ka kynja shnat treikam ka Tnad Sports hi ha kaba u Chairperson un dei u Myntri kam ialehkai bad u member secretary bad kiwei ki dkhot kin dei ki Ophisar na ka Tnad Sports bad kiwei ki Tnad ka Sorkar Meghalaya”.
Ka Secretariat Society kan treikam hapoh ka jingkhmih jong u Myntri kam ïalehkai, u ban long kum u Chairperson, katba ki heh Sorkar na ki Tnad bapher bapher kin long ki dkhot.
Ka 39th National Games, kaba la buh ban long ha u bnai Rymphang-Lber 2027, kala khring ïa ka jingmut jingpyrkhat kum ka lympung kaba heh bha ha Meghalaya, ka ban ïaid ryngkat bad ka jingrakhe ia ka jingdap 55 snem ka jingïoh Jylla la ka jong.