Wanrah ka sorkar ïa ka polisi ba thymmai ban ïoh pyllait kloi ïa ki koidi na phatok

Shillong, Nohprah 19 : U Myntri Rangbah ka Jylla Conrad K Sangma ha ka sngi Thohdieng, ula pynbna ba ka kynhun Myntri ka Jylla ka la ai jingmynjur ïa ka Jail Remission policy ba thymmai, kaba ïaid kat kum ka jingbthah ba dang shen jong ka ïing Bishar Supreme Court-kaba thmu ban pynsuk bad pynsted ïa ka kam ban pynlait kloi ïa ki koidi na phatok.
Haba ïakren bad ki nongthoh khubor hadien ka jingïalang ba long ha ka sngi Thohdieng, u Myntri Rangbah ula ong “Ka Kynhun Myntri kala ai jingmynjur ïa ka jingpynbna (notification) jong ka Remission Policy, kat kum ka jingbthah jong ka ïing Bishar Supreme Court. Baroh ki Jylla ki dang leh ïa kane, kaba thmu hi ka long ban pynsuk bad ailad ïa u Superintendent of Jail ba un shim rai suo moto lada u lane ka sngew ba dei ban pynduna ïa ka por pynsajia ne ban pynlait ïa u koidi na phatok”.
Ula bynrap ba kane ka polici kan wanrah ïa ka jingkylla kaba aibor ïa u ne ka Superintendent ki Jail ba kin sdang ïa ka jingpynlait ïa ki koidi khlem da ap ïa ka jingkyrpad da ka jingthoh na ki bahaïing hasem.
“Mynshuwa, ki bahaïing hasem ki hap ban thok shithi bad hadien kane yn sa shong bishar ïa ka case. Mynta, u Superintednent ki phatok, dalade, ki lah ban rai ïa ki case ba donhok ban pynlait noh na phatok”.