Da ka tulop ba shi bnai yn siew lypa ka sorkar na ka bynta ki nongtrei sorkar bad kiba ïoh penshon

Shillong, Nohprah 20: Hapdeng ka jingpynkhreh ia ka Christmas, kynsan kynsan ka sorkar Meghalaya kala pynbna ban siew lypa noh ia ka tulop ki nongtrei kam sorkar bad kumjuh ruh jong kiba la shongthait bad kane kan ai jingmyntoi yn duna ia ka 50,000 ngut ki nongtrei bad kumba 30,000 ngut kiba la shongthait.
Kane ka sien jam, ka long ban dang pynjur ia ka jingrakhe ia kane ka aiom lehkmen.
Ka kyrwoh ba la pynmih da u Commissioner & Secretary ba peit ia ka pla tyngka u Dr Vijay Kumar ha ka sngi Saitjaiñ ka la ong, “Ka tnad pla tyngka ka la pyllait ïa ka jingsiew lypa ïa ka tulop bad penshon shibnai ka ban ai jingmyntoi ïa kumba 50,000 ngut ki nongtrei bad palat 30,000 ngut ki nongïoh penshon ban pynkhlaiñ ïa ka jingrakhe jong ka aiom, na ka bynta baroh ki nongtrei casual bad kiba trei contractual kiba trei ha kylleng ka Jylla.”
Ka jingpyllait pisa lypa baroh ka long T.348.1 klur na ka bynta ka tulop, T.93.4 klur na ka bynta ka penshon, T.9.7 klur na ka bynta ka jingsiew (ki nongtrei casual) bad T.4.1 klur na ka bynta ki nongtrei contractual.
Nalor ki tulop, ka tnad ka la pynkhuid ia ka T.255.5klur na ka bynta ki lai tylli ki district council ban siew ia ka tulop ba mynta bad kaba dang sahteng.
La pynbeit ruh ïa ki bill jong ki kontraktor, ha kaba la pyllait T.416.1klur hapoh ki kam baheh (object head 53) bad T.154.7 klur hapoh ki kam rit (object head 57).
Ki jingpyllait pisa katkum ka tnad ki kynthup ïa, ka tnad PWD ha ka dor T.256.4 klur, ka tnad Urban Affairs- T.102.5 klur, Ka tnad Public Health Engineering- T.68.6 klur, ka tnad Sports & Youth Affairs- T.60.0 klur, ka tnad Bording – T.60.0 klur, ka tnad ka Koit ka Khiah -T.40 klur. Community & Rural Development- T. 102.9 klur bad ka tnad Agriculture & Farmers Welfare- T. 69.5 klur
Kane ka jingpyllait paidbah ka long ruh kum ka jingkyrshan ïa ki flagship skhim, ha kaba la kdew ba T.23 klur la transfer sha ki 92,051 ngut ki nongïoh jingmyntoi hapoh ka skhim Focus+ lyngba ka Direct Benefit Transfer (DBT).
“Ka tnad pla tyngka ka la pyllait lut haduh T.1602.9 klur ha u bnai Nohprah na ki marpoh khyndew jong ka jylla, kaba pyni ia ka jingkiew kaba 30.8% na kaba la dep, ban pynlah ia ki jinglehkmen Khristmas ha kylleng ka jylla”, ong u Kumar.