Shillong, Nohprah 20: U MLA bad u Myntri ka sorkar jylla uba khmih ïa ka tnat Arts And Culture u Bah Sanbor Shullai u la buh mawnongrim ïa ki 2 tylli ki surok kiba kynthup ïa ka surok ka ban shna ïa ka Feeder Road na ka jaka jong ka PWD kaba don hajan ka ïing jong ka kong Ester Bareh ka ban pynïasoh na Madanrit kaba dei ka surok kaba don mynta shaduh Umkynrut LP School Riat Laban Kynjat phutbol (Phase 1).
Kane ka surok ka dei ruh kaba la ïoh jingmang tyngka lyngba ka SPA scheme 2025-26 ha ka dor kaba T. 95.03 lak kaba la shim khia hi da u MLA ban pynïoh ïa kane ka jingmang tyngka na ka sorkar.
Ha kajuh ka por u MLA u la buh ruh ïa u maw nongrim na ka bynta ban shna ïa ka surok PWD kaba kynthup ruh ïa ka jingpynheh bad pyniar, nangta ka jingbuh ïa ka Aqueduct Dranage System bad ka jingsiang rong na kane ka surok kaba don mynta kaba long pyrshah ka madan Laban Nepali School down lyngba ka Seng Khasi Raid Laban Cultural Centre shaduh ka jaka sah jong ka kong Bobby Laloo bad kiwei pat ki nongshong shnong jong ka Upper Kench’s Trace bad ïa kane ka surok ba la buh maw nongrim la mang ha ka jinglut kaba T. 1, 85, 4000 kaba la shim khia da u MLA ka 19th South Shillong Constituency.
Ïa kine ki surok na ka liang jong u MLA u la pynioh kaba long na ka bynta ka jingmyntoi lang jong ki paidbah kiba mad jingeh ha ki rukom bapher bapher ba kynthup ïa ka jingdonkam ha ka ïap ka im, bad kiwei kiwei ki jingdonkam.
U la ong ruh ba ka jingïoh ïa ka surok ka long kaba kongsan bha na ka bynta ki nongshong shnong kiba la mad ïa ki jingeh na ka por sha ka por. Ïa kine ki skhim na ka liang u MLA u la pynïoh ki lad jingïarap na ka Special Plan Scheme.
