Shillong, Nohprah 20 : Ka Kynhun Myntri kaba la ïa kynduh ha ka sngi Thohdieng, ka la ai jingmynjur bad jingpynskhem ban seng ïa ka Meghalaya Livelihood Investment Financing Cooperative Society (MLIFCS).
Kane ka Cooperative Society ba thymmai kan treikam kum ka Financial Institution, ka ban bei pisa bad ïarap ai ram ïa ki kynhun Nongrep bad ki Processing Unit. Ka jingpynleit jingmut ba hakhmat eh ka dei ka rep ka riang bad ka food processing, da ka jingthmu ban pynsuk ïa ka jingpynïoh pisa ïa ki Nongrep bad pynshlur ban pynmih ïa ki mar bapher bapher na ki marrep.
“Ka jingthmu ban pynkha ïa kane ka Cooperative Society ba thymmai ka long eh ba kan shim ïa ka bynta kum ka Financial Institution ka ban bei tyngka ïa ki Cooperative Society bad ruh ba kyrshan ïa ki bad kyrshan ïa ki nongrep ba kin seng ïa ki processing unit bapher bapher khnang ba ka jingsiew sha ki nongrep kan long hapoh ka por ba dei” ong u Myntri Rangbah haba kren sha ki lad pathai khubor hadien ba la wai ka jingïalang jongka kynhun myntri
“Kane kan dei eh na ka bynta ka rep ka riang bad ka food-processing bad ngi ïohi ïa shibun ki lad ki lynti ban kiew ha kine ki lai-saw snem ban wan” ula ong.
Nalor kane, ka kynhun Myntri kala ai jingmynjur ruh ban pynkylla ia ka Meghalaya Planning Service Rules.
