Yn sei madan ka sorkar ïa ka kaiphod Reservation Policy kaba don haduh 4–5 hajar sla

Shillong Nohprah 19 : U Myntri Rangbah ka jylla u Conrad K Sangma u la kular ban sei madan noh shen ïa ka kaiphod jongka Expert Committee halor ka Reservation Policy kaba khia haduh 200 kilo bad don kumba 4000-5000 sla.
Haba kynthoh kylla ïa ka jingbyrngem u Nongialam ka VPP u bah Ardent Basaiawmoit ban pynlong biang da ka jingïakhih lada ym sei madan ïa kane ka kaiphod, u Myntri Rangbah u la ong “ Balei ngin ym sei madan ïa ka? Ngin sa sei shen khnang ba ki paidbah kin tip lut ka jingslem ka dei namar ba ki Ophisar bad ki dkhot ka Committee ki dang pule bniah bin pa bin ïa ka kaiphod shwa ban sei madan. Nalor kata kam long kaba suk ban pule kaba don haduh 4000 – 5000 sla bad khia ruh kumba 200 kilo. Ngi hap ban pule bniah namar lada bakla wat tang u comma bad phulstop ka la kit jingmut da kumwei pat”.
Ula batai ïa ka jingsyllang ka kam, haba pynpaw ba ki Ophisar ki hap ban shong bishar thik pa thik ïa manla ka sla jong ka kaiphod.
“U Chief Secretary bad kiwei ki Ophisar ki hap ban pule man ka laiñ, man ka sla bad ka dei ka kam kaba eh bha…..kin sa aiti noh ïa ka bad kin sa wanrah sha ka jingialang ka Kynhun Myntri…hooid shen ngin sa pynlait paidbah ïa ka namar kam don satia kano kano ka jingeh ban pynlait paidbah” ula ong.
U Conrad ula ban jur ïa ka jinglong kongsan ka kaiphod ïa ki paidbah bad ong “Khlem pep ngin sa pynlait paidbah ïa ka…ka dei ka kam kaba hap phikir bha, ki Ophisar kim lah ban kyntait wat tang shisla lane shi kyntien jong ka kaiphod”.