Shillong, Nohprah 18 : Ki trai shnong kiba shah ktah na ka jingpynheh ne pynïar ïa ka surok bah NH-217 ha East Garo Hills ki la dap da ka jingbitar kaba khraw namar ki khlem ïoh jingtip ei ei ruh em na ka sorkar ne khlem ïoh pdiang kano kano ka jingpyntip (notice) na ka sorkar shwa ban pyntrei ïa kane ka projek bad kane ka pynpaw ïa ka jingtlot jong ki bor synshar district bad wat ki bor shnong ruh. Ki la ïathuh ba ki la ïoh jingtip ïa kane tad haduh ynda la pynmih ïa ka public notice da u Deputy Commissioner (Revenue) shi taiew mynshwa.
Ki trai dukan, ki trai jaka ha Rongjeng bad Rongmil ki la pynpaw ba ym shym la khot ïa ka jingïalang hapoh ki shnong ki thaw ne khlem ai kano kano ka jingthoh ban pynshai halor kane ka jingpynheh ïa kane ka surok. Bun ki long ïing kiba la shah ktah ki la leit tohkit na DC ophis ban ïoh bailutksan hynrei ki bor synshar district kim patiaw satia ban ai ka jubab kaba shai hynrei la shu aiti beit ïa ki jaka ban pynbeit da u nongïasaid aiñ ba la thung da ka sorkar.
Kane ka jingbym shai halor kane ka kam ka la wanrah ka jingbitar ha ki trai shnong namar ki bor synshar ki shu thmu ban shu knieh beit ïa ki jaka puta khlem kano kano ka jingmynjur ki trai jaka. “ Kaei ka daw ba khlem ai jingtip ïa ngi naduh kaba sdang” ong ki nongshong ïew ha Rongjeng bad kane ka jingleh ka long kumba leh shilliang khmat ïa ki trai shong.
Ha ïew Rongjeng ki don bun ki dukan kiba la shna naduh ka por ba rim ba jah kiba lah ban shah pynpra noh ha kane ka jingpynheh surok. U MG Momin uba dei u nongkhaïi u la ong ba kane ka jingbym ai jingtip lypa ka la nang wanrah ka jingeh kaba khraw. “ Ngim don jingtip ei ei ruh em shaphang kano kano ka jingpyntip ne notice ne ïa uta u arbitrator lait noh dang shitaiew ei ei mynta”.
“ Hynrei kumba ka paw ha ka shithi jongka sorkar i kumba la dep rai ban shim beit ïa ki jaka puta jongngi lada ngi mynjur ne ngim mynjur ruh. Ka bai lut ksan ka long kaba rit palat pud bad mynta la shu aiti ha uta u Arbitrator ban pynbeit ïa ka kam khlem da kdew ne ai jinghikai ïa ki paidbah kumno ban leh” ong biang u Momin.
Uwei na ki nongtrei mon sngewbha u Cherian G Momin u la ong ka rukom leh kumba ka paw ka pyni ïa ka jinglong meng bad hanga mei jong ki bor synshar. Ka rukom thoh ïa ka Public Notice ba la pynmih ha ka 17 tarik u Naiwieng ruh ka long da ki kyntien byrngem byrsit ïa ki paidbah bad nalor kata khlem ai kano kano ka jingpyntip sha ki paidbah. Kane ka dei ka jingleh thombor jong kita kiba don ha ka bor.
Kumta ki trai shnong bad trai jaka ki pynpaw ba ki kwah ban ïoh ia ka hok kaba ki dei ban ïoh ym ban shu ia pynlut kai ïa ka por ban leit tynruh nawei ka jaka sha kawei pat ka jaka. Kumta ki trai shnong bad trai jaka ki byrngem ba lada ki bor synshar district kim pynshai bad ïarap ïa ki paidbah ban pynïoh ïa ka bailutksan na kaba shim ïa ki jaka puta kin ym ailad hynrei kin ïeng ïaleh pyrshah beit halor kane ka projek.
