Nongpoh, Naitung 07: Ka UDP Umsning Circle mynta ka sngi ha ka Executive Committee kaba la long ha Usning ka la rai ban dang pynkhlaiñ ïa ka party bad nalor kiwei kiwei ki rai ba ka la shim ban dawa na ka sorkar na ka bynta ki kam pynroi ha Umsning Constituency.
Ïa kane ka jingïalang la pynlong mynta ka sngi ha Umsning ha kaba la wan ban shim bynta lang naduh u Secretary ka UDP Ri Bhoi District, u Bah Michael Kharhunai, u President ka UDP Umsning Circle, u Bah Donkupar Sumer, u Vice President ka Constituency, u Bah Eddie G. Kharbani bad la don ryngkat lang ruh u Working President ka UDP na ka jylla, u bah Alantry Dhkhar bad kiwei ki nongïalam ka UDP na ka District bad na Umsning Constituency.
Ha kane ka jingïalang nalor ki jingïakren ban pynkhlaiñ ïa ka party shuwa ka election, ki nongïalam ka UDP na Umsning Constituency, ki la ïa kren ruh halor shibun ki mat kiba dei na ka bynta ki kam pynroi ha Umsning Constituency ba shen kin sa pynsgnew sha ka sorkar jylla.
Haba ïa kren bad ki Nongthoh Khubor hadien ka jingïalang, u President ka UDP Umsning Circle, u Bah Donkupar Sumer, u la ïathuh ba ha kane ka jingïalang la ïa kren halor shibun ki bynta ban dang pynkhlaiñ ïa ka party shuwa ka election 2023 bad la ïa kren ruh halor ki kam pynroi ba ki paidbah ki donkam ha Umsning Constituency.
U la ïathuh ba ki mad ba la ïa kren nalor ka kam ban pynkhlaiñ ïa ka party, la ïa kren ban dawa na ka sorkar ban kyntiew kyrdan noh ai ka Usmning C&RD Block sha ka Civil Sub Division, ka jingdawa ban kyntiew kyrdan noh ïa ka Umsning CHC sha ka Civil Hospital bad kumjuh ruh ban dei ban pynurlong ïa ka Central Agriculture University ha Kyrdemkulai bad ym ka College of Agriculture.
Ha kaba ïa dei bad kitei ki kam pynroi, ka UDP Umsning Circle shen kan sa kynduh ïa ki bor sorkar ha ka jylla ban pynngew pynsngap bad ba dei ban pynurlong na ka bynta kajingmynto jong ki paidba hapoh ka Umsning Constituency bad ha ka jylla hi baroh kawei., ong u Bah Sumer.
Ha kawei ka bynta, u la ong ruh ba ka UDP Umsning Circle kan dang pynkhaiñ ruh ïa ka party ba shen kan sa pynlong ïa ka General Council ban jied ïa ki nongkitkam ha u bnai Risaw 2022 bad wat la katta ruh kumba bun ki la thmu ban wan pynïasoh sha ka UDP ka party kan pdiang sngewbha ïa baroh bad ha kaba ïa dei bad ka jingthmu ka Umsning Constituency Political Forum (UCPF) ban pynïasoh sha ka UDP ka party kan khot shuwa ïa ki nongïalam katei ka Forum ha ka 15 tarik mynta u bnai ban ïa kren sani bad kaei ka rai kaba ki ioh pdiang kin sa phah sha ka District bad ka State ban bishar la ka dei ka jingpan ticket ne ka dei ka jingkwah ban pynïasoh sha ka UDP ban pynkhlain ïa ka party ha kane ka election 2023.
