Ryngkat bad 286 ngut kiba thut dkhot met lehkmen bad ai sngewbha Khristmas ka NPWF Mylliem

Shillong, Nohprah 18 : Ka National People’s Women Front Mylliem constituency da ka jingkyrshan u Bah Hamlet Dohling ba dei u MLA barim ka thain, ha kane ka sngi Palei ki la sam da ki nep kup syaid ryngkat ka song pisa sha ki palat 286 ngut ki nongshong shnong kiba don ka jingthut ha ki dkhot met jong ki.
Ha kane jingïalang kaba long ha madan Umlyngka la wan ban donlang ruh naduh ka President jong ka NPWF Kong Grace Kharpuri MDC, Kong Dame Ryntathiang President NPWF East Khasi Hills, ki nongïalam ka party na Mylliem Block, Rangbah Shnong Umlyngka Bah Stephan Lyngdoh, bad kiwei kiwei.
La pynphuh shuh shuh ïa ka jingïalang da ka jingrwai Khristmas bad ruh ka jingot ïa u cake christmas da ki heprit bad ki khynnah.
Na ka liang ka Kongsan haba kren ha ka jingïalang ka la ai ka jingïaroh kaba khraw ïa ki bahaiing jong baroh kiba don jingthut ha ki dkhot met kiba long ka jingai mynsiem kaba khraw bad ka jingkyrmen na ka bynta jong ki. Ka la ai nuksa ruh ba ki don bun ki briew kiba khraw bad shemphang ha ka pyrthei kiba u Blei u la jied kyrpang kum u Nick Vujicic uba watla um don ki kti bad ki kjat hynrei ka bor ïalap jong u pat ka long kaba borbah haduh katta katta.
“Phin peit ïangi kiba ieng hangne u Blei u la ai ka met ka phad kaba biang nadong shadong hynrei ngi dang duna ha baroh ki liang, ngi don ka jingduna ha ki liang bapher bapher. Nga ju peit ïa kine kiba don ka jinglong ba kyrpang, nga ju ïohi ba phi long ki briew kiba don ka jinglah ba kyrpang ban ïangi kiba don hangne namar phi don barabor ïa ka dur ba phuh samrkhie, phi hun phi suk katba mangi pat ngi khñium bad thnum ïalade.
Katba na ka liang u Bah Hamlet Dohling, Chief Adviser jong u Myntri Rangbah ka Jylla bad MLA barim ka thain u la ong ba ka jingpynlong jong ki ïa kane ka prokram ka dei da ka jingshemphang jong ki longkmie NPP na ka constituency.
“Ngi khot khnang ïa phi ki khun ba kyrpang namar man ka sngi phi don tang bad ki bahaiing, ki kmie ki kpa, para bad marjan marpa kumta na ka liang ka NPP bad NPWF hangne ha Mylliem ngi sngew dei ban khot sngewbha ïa phi ban ïa kynduh bad ïalehkmen na bynta ka Khristmas kaban sa wan,” u la ong.
Shuh shuh u ong ruh ba kane ka jingïakynduh lang ka long ban lehkmen bad sngewnguh na ka bynta kiei kiei kiba u Blei u la buh la mang ha ka jingim.
U ong ruh ba u sngewkmen haduh katta katta ha kane sngi ban ïohi ba ki poi haduh kattei ban donbynta lang ha kane ka jinglehkmen. Na ka liang u Bah Hamlet u la ai ka jingïaroh ïa ka jingtrei borbah jong ka NPWF Mylliem kiba la don ka bynta kaba khraw ban pynlong ïa katei ka prokram kaba jop.
Shwa kane na ka liang ka President jong ka NPFW Mylliem Kong Agnes Kharsahnoh ka la ïathuh ba ka jingseisoh bad ka jingshongkun jong katei ka jingïakynduh lang kadei da ka jingkyrshan borbah jong u Bah Hamlet uba don ka bynta kaba khraw haduh mynta ban trei jar jar na ka bynta ka roi ka jongka constituency.