Pynshai ki nongïalam ka NPP 5-Sutnga-Saipung halor ka jingïoh tiket ka kong Santa Mery Shylla

Khliehriat Naitung 07: Ki nongialam jong ka party National People’s Party jong ka 5-Sutnga-Saipung Constituency, lyngba u General Secretary u bah Heimonme Lamare, ki la pynpaw ba ka jingkynnoh jong kito ki nongialam ka NPP (5-Sutnga Saipung) kiba la mih noh na ka party ka long kaba bakla, ha kaba ki la kynnoh ba ka jingioh tiket ka kong Santa Mary Shylla ka dei namar ba ka don bun ka pisa katba u bah Hopeful Bamon pat um don shibun ka pisa ne u duna pisa, kane ka jingkynnoh ka long kaba bakla.
U bah Heimon Lamare, u la iathuh ba ki nongialam jong ka party NPP na Shillong, ki la phah da ki kynhun syntiat (Intelegent) ban sngap thuh ïa ka jinglong jingman hapoh ka 5-Sutnga Saipung Constituency, khnang ba kin dup lah ban shim ïaka rai ha shwa ban ai ïa ka tiket ban ïakhun ïa ka election ha u snem 2023 “Ia ki kynhun syntiat ki la phah haduh ar sien ban wan syntiat ha kaba ma ngi kum ki nongialam jong ka party ruh ngim tip bad ngim ithuh satia ïa kita ki nongwan syntiat” ong u bah Heimonme Lamare.
“Ha ka sien kaba nyngkong, ha ka por ba ngi leit ban ïakren na ka bynta ka tiket, ka long kaba shisha ba ngi kum ki nongkitkam jong ka 5- Sutnga Saipung bad nongkitkam jong ka NPP East Jaiñtia Hills District ngi la ïa rai ban pynieng ïa u bah Hopeful Bamon kaba long katkum ka jingbthah jong u bah Sñiawbhalang Dhar bad ha kato ka por i kong Santa Mary Shylla im pat pan tiket na ka party bad katkum ka jingtip jong nga i kong Santa i la dep iakynduh ïa u bah Thijlang Shyrmang uba la bat kum u President jong ka 5-Sutnga Saipung Block ha kato ka por, tangba ngam tip pat ki iakren kumno ha kaba ïadei bad ka tiket, tangba u bah Thihlang Shyrmang u la iathuh ïa nga ba u la phah ïa i kong Santa Mary Shylla ba in aplai noh ïa ka tiket na Shillong namar na ka Sutnga Saipung Block te ym don lynti shuh bad kata ka long kaba shisha hi namar ha kato ka por la dep ban phah ïa ka kyrteng u bah Hopeful Bamon, te hadien ba ngi la ïakynduh ïa kitei kiba halor kiba don ha Shillong ki la iathuh ïa ngi ba i kong Santa ruh i la aplai ïa ka tiket te kumta kim pat lah ban rai lane ban pynbna ïa kan ka kyrteng ban ai tiket, kim pat lah ban ong la yn ai ïa u bah Hopeful Bamon ne ïa i kong Santa Mary Shylla, te kumta ki heh ka NPP kiba na Shillong ki la ong ba kin phah noh da ka kynhun syntiat (Intelegence) ban sngapthuh mano ba don jingkyrmen ban jop.
Kumta ki la phah ïa kita ki kynhun syntiat kiba wat ma nga u nongkitkam jong ka party ruh ngam tip satia ïa kita ki Intelegent, kumta ynda ka kynhun syntiat ka la pyndep ïa ka kam, kata ha ka sien kaba nyngkong, ngi kum kum ki nongkitkam ruh ngim lah ban ngeit, hadien kane ha ka sien kaba ar ki la phah biang ïa kita ki kynhun syntiat bad ynda ki la pyndep ïa ka kam ha kane ka sien kaba ar bad lap ba ka kong Santa Mary Shylla ka kham biang ha ka jingdon ki nongkyrshan bad ki nongthep vote kumta ngi la ïa hun lang ïa ka rai ban ai tiket noh ïa i kong Santa Mary Shylla, ym dei satia kumba ong kito ki nongkitkam kiba la mih noh na ka party kiba la shu kynnoh ba dei namar ba i kong Santa i don bun ka pisa na kata ka daw in sa ioh ïa ka tiket na ka party NPP, kane ka jingong ka long kaba bakla haduh katta katta kaba ngim lah ban pdiang” Pynshai shuh shuh u Secretary jong ka NPP 5-Sutnga Saipung Constituency, u bah Heimonme Lamare.