Da u mot dur ba shirynïeng u Myllung Soso Tham bad ka State award, tyrwa u Bah Sanbor

Shillong, Nohprah 18: U Myntri Sorkar ba peit ia ka tnad Lariti u Bah Sanbor Shullai u la bthah ia ki ophisar ba kin pynbiang noh kloi ia ki kot ki sla halor ka jingtyrwa na ka bynta ban pynieng ia u mot dur ba shi rynïeng jong u Myllung Soso Tham ha phyllaw jong ka State Central Library, Shillong.
Ia kane u Bah Sanbor Shullai u la pynpaw ha ka jingialang ban rakhe ia ka lyngkhuh sngi iap ba 85 snem jong u Myllung Soso Tham, ia kaba la pynlong ha u Soso Tham Auditorium Hall.
Haba kren ha ka jingialang, u Bah Sanbor u la ong nalor ba u la tyrwa ban pynieng noh da u mot dur ba shi rynieng, hynrei kin sdang noh ruh ia ka khusnam kaba yn tip kum ka Soso Tham state award, kumba la leh lem ia kiwei de ki khla wait jong ka jaitbynriew.
“Ha phyllaw jong ka Soso Tham Auditorium Hall ki ieng tang ki mot dur kiba shi rynieng suda kum jong ka Indira Gandhi, u Subhash Chandra Bose bad ki lai ngut ki khla wait jong ka jaitbynriew katba u mot dur jong u Myllung Soso tham tang uba na tyrpeng sha khlieh” ong u Bah Sanbor.
Shuh shuh u Bah Sanbor u la ong ia kato ka jaka ba buh ia u mot dur jong u Myllung Soso Tham uba la ieng mynta la palat phew phew snem ngin rah noh sha kawei ka jaka bad ha katei ka jaka ngin pynieng da u mot ba shi rynieng.
Halor kane ka jingthmu u Bah Sanbor u la bthah ia ki ophisar jong ka tnad Lariti ba kin pynkloi noh ia ki kot ki sla, khnang ba ma u kum u myntri ba peit ia kane ka tnad sorkar un ioh ban ai ia ka jingmynjur kloi katba lah.