Pynthikna ka tnat PHE ban thep noh da ki pipe um ba thymmai naduh Assembly sha Mawroh

Shillong, Nohprah 18: Ka Seng Samla Mawlai Pyllun (SSMP) lyngba u President u Bah Samuel Biam ka la pynpaw ïa ka jingkmen kaba khraw hadien ba ka tnat PHE lyngba u Additional Chief Engineer ka la pynthikna ba shen ïa ka kam ban thep noh da ki pipe ba thymmai naduh Assembly, sha Polo bad shaduh Mawroh yn sa pyntrei noh ïa ka kam khnang ba kan lah ban ïarap halor ka jingduna bad kyrduh um jong ka shnong Mawlai baroh kawei.
Haba kren sha ki lad pathai khubor u Bah Biam u la ïathuh ba u Additional Chief Engineer u la ïathuh ba ïa kane ka kam la dep ban khot tender bad na ka liang u contractor ruh un sa sdang noh ïa ka kam.
U la ïathuh ba ïa kane ka kam ka seng ka la buddien naduh u bnai Ïaïong bad ha u bnai Nailur la dep ruh ban pynlong ïa ka jingleit jurip lang halor kane ka kam.
Na ka liang u nongïalam ka SSMP u la ong ruh ba kiba bun ki pipe kiba don ha ka shnong Mawlai ki la sniew bad lah rim kumta la donkam ban bujli noh da kiba thymmai bad ka jingpyntip jong u Additional Chief Engineer ban bujli noh da ki pipe kiba thymmai kan long ka jingmyntoi kaba khraw bha ïa ka shnong Mawlai baroh kawei.
“Na ka liang u Additional Chief Engineer u la ïathuh ba u la phah ruh ka jingthoh sha ka tnat PWD Roads ban pan jingbit na ka bynta ban thep ïa ki pipe um kaba dei ïaid lyngba ka surok PWD bad kumta tang shu la ïoh ïa ka jingbit yn sdang noh ban pyntrei ïa ka kam bad tang shu la pyndep ïa ka jingthep ïa ki pipe ba thymmai ngi kyrmen ba ka shnong Mawlai baroh kawei kan sa pahuh um bad ka jingpynpoi um sha manla ki thliew ïing kan sa long noh kumba 5 haduh 6 sien ha ka shi taïew,” ïathuh u President ka SSMP.