Nongpoh, Nohprah 18 : Ki sur thiang bad sur kynud ka kynhun rwai ba pawnam ka jylla ka Kids Tarari na Nongstoiñ mynta ka miet kala pynum ïa kiba bun ki paidbah nongpeitkai khamtam ki heprit nalor kiwei kiwei ki nongrwai ba pawnam kum ka Ratam, ka kynhun Hills of Praise bad ka samla Kyntiewlin Mawphniang, ryngkat ka jingshimbynta lang daka kynhun rwai jong ka CE Society Balang Presbyterian Umling haka Food Fest cum Gospel Concert bala pynlong da ka Balang Presbyterian Umling.
Kane ka iew ïadie ïathied kala thnem mynta ka janmiet da ka jingtuid ki paidbah ha madan phutbol ka shnong Umling ryngkat ka jingpynshongshit kitei ki kynhun rwai ba paw ka jylla ban ïadie ïathied ïaki jait jingbam bapher bapher bad ki tiar ki tar namar ka Balang Presbyterian Umling lyngba kana ka iew ka don ruh ka jingangnud ban pynmih pisa naka bynta ban tei ïaka iingmane jong ka Balang ha katei ka shnong.
Ha kane ka janmiet la sakhi ruh da ka jingdonlang u Tbn. Mayral Born Syiem ba dei ruh u MLA ka Nongpoh, ka Kong Rona Khymdeit MDC, u Raja Brahma Project Director ka DRDA bad kiwei kiwei ryngkat ki nongïalam Balang ka Balang Presbyterian Umling.
Haba kren ha kane ka sngi naka liang ki nongkren kila pynpaw ka jingsngewkmen ban iohi ba katei ka iew ïadie ïathied ka thnem namar kum ka Balang ka don ka thong ban pynmih pisa lyngba katei ka iew ban shna ïaka iingmane thymmai nalor ka jingbuh ruh ïaki dukan kiba khring ïaki paidbah naduh ki dukan bam, ki dukan jaiñ bad kiwei kiwei.
Lyngba katei ka prokram kan wanrah ruh ka jingtehsong ka jingtylli hapdeng ki nongshong shnong bad kyrmen skhem ba katei ka prokram kan long kaba seisoh katkum ka jingthmu jong ka Balang naka bynta ka kam jong u Blei.
