Shillong, Nohprah 17 : U Chief Adviser jong u Myntri Rangbah ka Jylla, Bah Hamlet Dohling ha ka sngi Ba-ar u la plie paidbah ïa ka kamra klas (additional classroom) ba la shna thymmai ha Ramakrishna Mission Higher Secondary School Mylliem kaba la tei lyngba ka skim Chief Minister Special Development Fund (CMSDF) 2022-23 ha ka jingmang pisa kaba 10 lak tyngka.
Ha kane ka sngi la donlang ruh naduh u Myntri ka Hima Mylliem Myntri M Kharlukhi ba dei ruh u dkhot ka Managing Committee, u Rangbah Shnong Mylliem Kyndong Bah I Kharkongor, Principal, ki nonghikai bad ki khynnah skul.
U Kongsan haba kren ha kane ka sngi, u la ong, “Nga khmih lynti ba kine ki jingïarap ba ka skul ka ïoh kan long ka jingmyntoi ïa baroh bad kan long ruh ka shlem kaba sei kham bun ki khynnah kiba stad kiba shemphang bad kiba donakor donburom.”
Lah ruh ban kdew hangne ba katei ka skul kadei kaba la sei ïa ki Topten ha ka result SSLC jong ka MBOSE.
