Shillong, Nohprah 17 : Ka United Democratic Party (UDP) ka la kam ba kan sa jop kham bun ngut ki MLA ha ka elekshon ban wan da kaba ïathuh ba kum ka party ki la long ruh kiba la pynkhreh ban ïakhun ïa ki jingeh ban poi sha ka thong.
Haba pynpaw ïa kane u Nongïalam ka Party ba dei ruh u MLA ka Khliehriat Bah Kyrmen Shylla u la ong ba ki shaniah ha ka bor u paidbah ban ai ïa ka rai kaba radbah na ka bynta ka party.
“Kum ka party hi ngi la don ka jingsngewskhem ba ngin poi beit sha ka thong bad ngi long ruh kiba kloi ban ïakhun ïa ki diengpyngkiang kiba wit,” u la ong haba kren bad ki lad pathai khubor.
Shuh shuh u ong ruh ba kum ka party ka la pynkhreh naduh mynta ïa kane bad dei na kane ka daw ki sngewskhem bad don jingkyrmen ba kane ka thong kaba ki don kan seisoh.
Ha kajuh ka por u Bah Kyrmen u ong ba man ka elekshon ki paidbah ki khmih lynti bad kyrmen ba ka UDP kan ai ka jingshakri kaba paka
U Bah Kyrmen u la banjur ruh ba kaba sah mynta ka long ba ki paidbah ki dei ban sngewthuh ba lada ki kwah ba ka UDP hi kan pyni ïa ka jinglah jong ka ban synshar ki donkam nyngkong shwa ban jop kham bun ki MLA kaba mut ban ïoh ïa ka jingbun paid ban thaw ïa ka sorkar.
“Na kata ka daw ngi kyrpad ïa ki paidbah ka jylla ba ngin pynjop kham bun ki MLA na ka UDP khnang ba ngi pat ngin lah ban ai ka jingshakri. Lada ngim lah shisha ban pyni ïa ka jingtbit ban treikam hangta kein phi don ka hok ban kynthoh bad ngi ruh ngin pdiang ïa kata,” u la bynrap biang.
