Jowai, Nohprah 17: Ka kali u MDC ka Congress u ma Rikut Parien hynnin ka sngi hadien ka jingshah rah sha Police Station Jowai naka daw ba tah ïit ïong, ha ka por ba u don lang hapoh kali lem bad ki paralok.
Hynrei mar ïa poi ha phyllaw ka Police Station Jowai, utei u MDC khlem da bunktien shuh ula weng noh ïa kitei ki jingtah ïit ïong (Sun Control) jong ka kali Maruti Car jong u.
Na ka liang u ma Rikut Parien ula ai khublei ïa ka tnad pulit kaba la shim khia ïa kane da kaba pyntreikam katkum ka SOP bala rai da ka Supreme Court, ula ong rum um kwah ban ïaleh pyrshah ïa kane wat lada kam dei kaba ïong 100% ïa kaba la tah da u Driver naduh 7 bnai mynshwa.
Utei u MDC ula ong ka don ka jingkyrmen ba ka tnad pulit kan pynrkhing ïa kane katkum ki kyndon aiñ bad ban pyntreikam ïa baroh salonsar naduh ki kali rih haduh ki kali heh ne ki kali rem dor, namar ka aiñ hi kam shem la ñiewshilliang ïa kiba rit ne uba heh hynrei ka long ka juh ïa baroh.
