Naduh u snem 2019 haduh 2021 sahteng ki Bill jong ki Contractor, kyrpad ïa ka sorkar ban pyllait noh

Shillong, Nohprah 16: Ka War Jaiñtia Association Contractor, Amlarem Sub Division, West Jaiñtia Hills ka la kyrpad jur ïa ka sorkar jylla ba kan sngewlem ba kan pynlait ïa ki Bill jong ki Contractor naduh ki kam repair bad ordinal ha ka PWD Road and Building bad kumjuh ha ka tnat Water Resource (Irrigation) bad khamtam eh ïa ka JJM na ka PHE ba shibun ki Bill kiba dangsah pending ba la kit ram da ki Contractor na ka bynta ki kam ba la dep pyntrei.
Na ka liang ki nongïalam jong ka WJAC, ki la ïakynduh ïa baroh ki Contractor kiba la pyntrei ïa la ki jong ki jong ki tnat ki bym pat ïoh ïa ki Bill la bun bun snem. “Kaba pynsngewsih ïa ki Contractor ka long ba ki pyllait Bill tang T. 10 hajar ne T. 15 hajar marwei bad khamtam eh ïa ka tnat PHE kiba dang pynsah ïa shibun ki Bill ordinal kiba la dep pyntrei na ka bynta ki kam ka JJM bad kiwei kiwei ruh,” ong u Convenor bad Class-1 Contractor, Amlarem Sub Division u Bah K Pohshna.
U la ong ba na ka liang ki Contractor jong kane ka thaiñ Amlarem ki kyrpad jur ïa u Myntri Rangbah ba donburom ka jylla ba un sngewlem ban pynlait noh hapoh une u bnai Khristmas bad New Year namarba naduh ba la sdang pyntrei naduh ki snem 2019 haduh 2021 ter ter haduh mynta dang don shibun ki Bill kiba sahteng. Haba ki nongïalam jong ki Contractor ki la ïakynduh ïa u Engineer bad SDO kine ki ud ba kim don bor eiei bad ka jubab ba ki ïoh ka long ba ka shong beit ha ki bor jong ka sorkar hapoh ka jingïalam jong u Myntri Rangbah u Conrad Sangma ryngkat ka kynhun Myntri sorkar jong ka jylla hi baroh kawei.
“Bad kawei kaba sngewsih eh, ym duna ïa ka 7 haduh 8 snem ka jingkyrduh kam ka jingkyrduh jam ka long kaba phylla, ba wat ki kam repair na ka bynta ki contractor kiba rit bad bah eh ruh kim ïoh kam shuh la bun bun snem namar ki Engineer ïa kane ka jaitkam ruh ki la ud ba kim don bor ban leh eiei ka shong beit ha ka sorkar jylla ba kan ai bor ïa ki engineer ne SDO ba kin ai kam ha la ki jong ki jong ki thaiñ kiba ki dei ban peit khnang ba kan long ka jingkyrkhu bad ka jingmyntoi ïa ngi bad ban lah ban siew wat ïa ka bai kot bai sla bad ka GST ba ngi hap ban siew manla ka por. Kumta kane ka la wanrah shibun ki jingeh bad jingkhuslai ïa ki Contractor ba kim ïohkam ïohjam shuh bad ka la buh jingeh shibun wat ban pyndap ïa ka ïing ka sem,” ong u Bah Pohshna.
Kumta u la ong ba na ka liang ka seng ka kyrpad jur ïa ka sorkar jylla ba u snem 2026 ba kan ai kam ai jam lem namar ki don shibun ki jaka trei ban repair ha la ki jong ki jong ki surok kiba hab hapoh ka Border Area Amlarem Sub Division bad ïa kane ka kam la aiti ha u, uba long kum u Convenor bad Contractor ban kyrpad ïa ka sorkar ba kan ïarap lem ïa ki Contractor kiba mad ïa kane ka jingeh kaba khraw.