Nongstoiñ, Nohprah 16: Na ka bynta ban ai ka jingshakri kaba paka ïa ki paitbah hapoh ka jylla ha kaba ïadei bad ka jingkoit jingkhiah, ka sorkar ka la nang pynbun shuh shuh ïa ki jaka sumar kata naduh ki Sub Health Centre haduh ki Primary Health Centre.
Haba phai ha ki shnong jong ka West Khasi Hills, ka shnong Seiñduli kaba hap ha ka Mawshynrut constituency ka dei kaba don bok haduh katta katta. Namar, hadien bun phew snem ba ka sorkar lyngba ka tnad ka koit ka khiah ka la buh ïa ka sub health centre ha katei ka shnong na ka bynta ban shakri ïa ki paitbah kiba pang ba shitom, mynta la kyntiew kyrdan noh sha ka Primary Health centre.
U bah Pherikstone Lyngdoh uwei na ki rioew pawkhmat jong katei ka shnong haba ïakren bad u nongthoh khubor, u la ong ba ki paitbah nongshong shnong jong katei ka thaiñ ki la ap khmih lynti la bun bun phew snem ba ka sorkar kan ai noh da ka jaka sumar kaba kham biang, hynrei dei haduh kine ki snem ba katei ka jingangnud jong ki ka la urlong.
Ha kajuh ka por u la ong ba hadien ba ka sorkar ka la pyntip ba ïa katei ka sub centre la kyntiew kyrdan sha ka PHC, ki paitbah ki la kmen haduh katta katta bad ki la pynpaw ïa ka jingsngewnguh ïa ka sorkar ba ka la phaikhmat sha katei ka thaiñ.
Nalor kata u la ong ruh ba hadien ba la dep ïoh ïa ka jaka ban shna ïa katei ka PHC bad la dep ïasoi ïa ka soskular bad ki trai jaka, ka sorkar ka pynbit pynbiang ïa ki jingdonkam baroh bad la dep khot tender na ka bynta ban shna ïa katei ka jaka sumar.
Utei u rangbah u la ong ruh ba na ka liang ki paitbah ki la pynpaw ruh ka jingkhublei kaba kyrpang ïa u bah Methodius Dkhar MLA ka thaiñ, namar ba naduh ka por ba u sdang ban ïalap election u la kular ha ki paitbah ba un trei shitom ban pynurlong ïa ka jingdawa jong ki paitbah.
Hadien ba u la sha jied kum u nongmihkhmat ki dak ki shin ki paw bad wat la um shym pat la lah ban pynurlong lut ïa baroh ki jingdonkam na ka bynta ki paitbah ruh. Hynrei, katba nangmih ki sngi ki kam pynroi hapoh ka constituency ki la nang poi ter shi ter bad ki paitbah ki kyrmen ba ha kane ka kynti lei lei ba ka sorkar ka la thung ïa u kum u Myntri sorkar, ki paitbah ki don ka jingkyrmen kaba khraw ba un lah ban kham pynbun shuh shuh ïa ki kam pynroi hapoh ka constituency baroh kawei.
