Da ki skul yn seng ka sorkar ban ai jinghikai kumno ban ïakhun seng kieng atiar hapoh sor bad hapoh khlaw

Shillong, Nohprah 15 : Ka Sorkar Jylla kala pynbna paidbah ban seng noh ïa ki ar tylli ki skul ki ban ïakhun ïa ki kynhun kieng atiar ha sor bad ha khlaw kiba la tip kum ka Urban Warfare Training Facility (UWTF) bad ka Counter Insurgency & Jungle Warfare (CI&JW) School ha Jylla, ban pynkhlaiñ ïa ka tnad Pulit ha ka jingïakhun ïa ki riewpyntriem/riewkiengatiar ha Jylla.
Kat kum ka jingpynbna bala pynmih da ka Tnad kam Pohïing (Police), ïa ka Urban Warfare Training Facility (UWTF) yn seng ha SF-10, Mawiong.
Kane ka jaka ai jinghikai kan pynïaid ïa ki jinghikai naduh ka basic Close Qauater Battle (CQB ) ne ka jingïakhuh marmet, haduh ka jingpynkhuid ïa ki riewbymman na ki ïing kiba bun mala, ka jingpynlait im ïa ki nongshah rahbor, ka jingpynkhlaiñ ïa ki lad peitngor ha sor.
Ka jingpynbna ka Tnad kam Pohïing ka pyntip ruh ïa ka jingseng ïa ka Counter Insurgency & Jungle Warfare (CIJW) school ha Baghmara, South Garo Hills, Meghalaya ban ai ïa ki jinghikai pyntbit ha ka jingïakhun ïa ki kynhun kiengatiar bad ka sap ïaleh thma ha ki jaka khlaw sha ki Pulit ka Jylla bad ki Commando nalor ban ai jinghikai ïa ki Unit ba kyrpang.
Nalor kane, ka Tnad ka pynbna ruh ia ka jingkyntiew kyrdan ïa ka Police Station ha Byrnihat, Ri-Bhoi District ka ban tip baroh shi katta kum ka Byrnihat Police Out Post.
U pud treikam jong ka Byrnihat Police Station ki long ka Jorabat Outpost (Assam) sha ki bynta ba shatei, Umsning Outpost/Sonapur Police Station (Assam) sha Mihngi, Nongpoh Police Station sha ki bynta ba Shathie bad Khanapara Police Station sha ki bynta Sepngi.