Ka Meghalaya House ha New Delhi, ka dei ban shakri nyngkong eh ïa ki paidbah ka jylla: Conrad

SHILLONG, Nohprah 15: U Myntri Rangbah ka jylla u Conrad K Sangma mynta ka sngi u la plie ïa u paidbah ïa maw nongrim na ka bynta ban tei ïa ka Meghalaya House Annexe kaba thymmai ha 9, Dr. A.P.J. Abdul Kalam Road, New Delhi.
Ia kane ka jingplie ia u maw nongrim la la ia don lang u Symbud Myntri Rangbah ka Jylla u bah Prestone Tynsong bad u myntri sorkar ba peit ia ka tnadGeneral Administration Department (GAD) Minister Sosthenes Sohtun bad ki heh ophisar sorkar.
ïa kane ka Meghalaya House yn sna ha ki ar bynta, ka bynta kaba nyngkong kan kynthup ïa 24 tylli ki guest room ha ryngkat bad ka kamra pynlong jingialang ha ka mang tyngka ba la kot haduh ? 22 klur.Kane ka Annexe kan don beit hapoh jong ka phalor jong ka Meghalaya House complex, kaba rim ia kaba la tei ha u snem1971 ha ka jaka kaba heh 1.99 akar.
Haba kren ha kane ka sngi, u Myntri Rangbah ka Jylla u la ong ba ka Meghalaya House ha Delhi ka dei ban shakri nyngkong eh ïa ki paidbah ka Jylla da kaba pynthikna ïa ka jaka sah kaba pynsuk bad kaba pdiang sngewbha ïa ki nongwan kai bad ki heh sorkar kumjuh. U la kdew ba ka jingpynrung ïa ki kamra thymmai kan pyndap ïa ka jingbun ki briew na Meghalaya kiba wan sha Delhi na ka bynta ki kam ki jam,ki eksamin, ki jingwan shah sumar bad kiwei kiwei ki jingïadei.
U la bthah ia ki heh ophisar ban pynthikna ba ia ka iing ba thymmai la shna katkum ka standart bad kaba bha bad paka tam, da kaba buh ha ka jingmut ia ki jingdonkam ba mynta. “Ngi kyrmen skhem ba ngin sa ioh ia ki jingtei kaba bha bha ryngkat bad ka jingshakri kaba biang”, u la ong.
U Myntri Rangbah ka Jylla u la ong ba ka Meghalaya House ka dei ban long ka jingjied kaba nyngkong eh na ka bynta ki nongshong shnong ka Jylla haba ki sah ha Delhi.
“Ynda la dep, ki 24 tylli ki kamra kan kyntiew shibun ïa ka jinglah jong ngi ban pdiang ïa ki nongwankai na Meghalaya.Nga khmih lynti ba ngin lah ban pyndep ha ka por kaba biang ïa kane ka projek,” u la bynrap.
Ka jingtei ia ka Meghalaya House Annexe la khmih lynti ba kan pynkhlain ia ka jingdon jong ka Jylla ha ka nongbah jong ka ri bad kan pynbha ia ki jingdonkam na ka bynta ki nongwan kai na ka jylla Meghalaya.