Mawkyrwat, Nohprah 15 : Ki kynhun Sengbhalang bapher bapher kiba hapoh jong ka South West Khasi Hills District kiba kynthup ka KSU, ka HANM, ka HITO, ka SSSS, ka FKJGP, ka HNYF, bad ka HYC mynta ka sngi ka 15 tarik u Nohprah, 2025 ki la leit ban ïakynduh kyrkieh ïa u Additional Deputy Commissioner ka South West Khasi Hills District, u bah L.T. Tariang ban pyrshah jur halor ka jingthmu jong ka sorkar ban pynkynriah kam noh ïa ki ophisar ki bym pat kut ka por treikam jong ki.
Lah ban kdew ba ka jingthmu jong ka Sorkar ban pynkynriah kam napoh ka South West Khasi Hills District ka dei ïa u Bah B. Jyrwa, MPS uba bat kum u Superintendent jong ki Pulit ka South West Khasi Hills District bad ïa kiwei kiwei ki ophisar kiba ka jingtreikam jong ki ka dang long dang shibit por.
Namarkata, da ka jingsngewkhia bad jingkitkhlieh na ka bynta ki paidbah, ki Sengbhalang hapoh ka South West Khasi Hills District ki la ban jur ïa ka sorkar Jylla ba ïa ki ophisar kiba treibha na ka bynta u paidbah la kumno kumno kam dei ban shu pynkynriah kam shiteng por khlem pat dap pura ka por treikam hapoh ki distrik ba ki ki don.
Ym tangkata, ki sengbhalang hadien ka jingïasyllok bad ki nongshong shnong hapoh ka South West Khasi Hills District ki la shim ïa ka rai rangbah ban dawa na ka sorkar ba ka dei ban wanrah ïa ki heh sorkar kiba ha khlieh kum u Superintendent jong ki Pulit ne ki Magistrate bad kiwei de ki ophisar kiba dei khasi halor ka nongrim ba kan don ka jingïadei kaba jan bad ki paidbah.
Kumta, ki sengbhalang ki la maham jur ïa ka sorkar ba kam dei ban ïalehkai bad ka paidbah ka South West Khasi Hills District ban weng ne wanrah ophisar katba mon na ka bynta ka jingmyntoi jongno re jongno khlem da pyrkhat pat ïa jingduhnong jong ka distrik.
