Kum ka dak ka jingithuh, ïalong kawei, rakhe ka JDHS ïa ka Advance Christmas ha Ratson Pavilion

Shillong, Nohprah 15: Ka ophis Joint Directorate of Health Services ka la pynlong ïa ka 1st Awards Cum Advance Christmas Celebration ha ka 9 tarik mynta u bnai ha Ratson Pavilion, kaba long kum ka dak jong ka jingithuh, ka jingïalong kawei bad ka mynsiem jong ka jingrakhe ïa kane ka jingleh kmen na ka bynta ki nongtrei jong ka koit ka khiah jong ka jylla Meghalaya.
Ha kane ka jingrakhe la wan ban long kongsan da u Bah Wailadmiki Shylla, u Myntri ka tnat Health & Family Welfare, ka sorkar jylla; Dr. Joram Beda, Commissioner & Secretary, Health & Family Welfare; bad u Ramakrishna Chitturi, Mission Director, NHM.
Ka jingïashim bynta jong ki, ha ryngkat bad baroh ki Directors ka Health Services na baroh 3 tylli ki Directorate, ki heh ophisar na ka jylla bad na ki District, nangta ki Joint Director, ki State Nodal Officer, ki Medical Superintendent, ki Medical Officer, ki Programme Consultant bad Manager, bad ki nongtrei na ka tnat ka Koit ka Khiah, ba kynthup na ka NHM, MHSSP, MHIS, MMDSL, ABDM, bad kiwei ki jaka pule doktor na kylleng ka jylla kiba la wan ban ïashim bynta ha kane ka jingrakhe.
Ha kane ka prokram la ïakren halor ki jingjop ba la noh da ka tnat ka Koit ka Khiah da kaba ai burom ruh ïa ki jingïoh syrnot ka 15 NQAS-certified bad kiwei ki lad ai jingsumar. La don ruh ka jingai ïa ki 5 tylli ki khusnam ba kyrpang halor ki jinglah ban treikam bha kiba hapoh ka LaQshya, MusQan, bad NABL Certification, ka jingithuh ïa ki lad jingsumar haba ïadei bad ki kmie kiba armet, ka jingsumar ha ki khyllung khynnah bad kiwei.
Ha ka jingkren u Myntri ka tnat ka Koit ka khiah u la ïaroh ïa ki jinglah ban ai ka jingshakri jong ki nongtrei ka tnat ha kylleng ki jaka jong ka Meghalaya. U la pynskhem ïa ka jingangnud jong ka sorkar ban pynthikna ïa ki lad ai jingsumar kaba dei ban poi sha baroh ki nongshong shnong jong ka jylla da kaba donkam ka jingïatreilang, ka jingtreihok ïa ka kam.
Kane ka prokram ka pynphalang ruh ïa ka jingïaid lynti ka jingkylla jong ka JDQC naduh ba la pynlong ïa ka jingïalang kaba nyngkong ha ka 25 tarik u Kyllalyngkot 2023.
Nalor ki khusnam, kane ka jingïalang ka la wanrah lang ïa baroh ki nongtrei ka Koit ka Khiah ban rakhe ïa ka sngi ka jingkmen, ka jingsuk bad ka jingïalong kawei ha ka jingrakhe ïa ka Advance Christmas, kaba pynkhlaiñ ruh ka jingïateh ki jaka pule bad ka jingshim rai kaba thymmai na ka bynta ki snem ki ban dang wan.