Rah ka Di-tum-tum SC ïa ka nam lahduh ryngkat ka song pisa ba T.1 lak ha ka 2nd FLT, 2025 ha Balat

Mawkyrwat, Nohprah 15: Ka Di-tum-tum Sports Club ka la long ka kynhun ba rah ïa ka nam lahduh ha ryngkat khusnam bad ka song pisa kaba 1 lak tyngka ha ka lympung ïalehkai ba la tip kum ka 2nd Football League Tournament, 2025, ba la pynïaid da ka Southern Border Sports Association ha Madan Balat, South West Khasi Hills District.
Ka jingrah jong ka Di-tum-tum Sports Club ïa ka nam lahduh mynta ka sngi ka 15 tarik u Nohprah, 2025 ka dei hadien ba ka la pynliem noh da 2-0 kol pyrshah ïa ka Nongthymmai Sports Club ha ka jingïakhun phainal jong kane lympung.
Lah ban kdew ruh ba ka jingthmu jong ka Southern Border Sports Association ban pynlong ïa kane ka lympung ïalehkai ka long ban kyntiew ïa ka sap ka phong jong ki khun samla napoh ka thaiñ Ranikor.
Hadien ba kut jong ka jingïalehkai, na ka liang ki nongpynïaid ki la sam ïa ki khusnam sha baroh ar tylli ki kynhun kata sha ka Di-tum-tum Sports Club kaba la rah ïa ka nam lahduh ha kaba ka la rah ïa khusnam ryngkat ka song pisa kaba T. 1 lakh tyngka, nangta, ka Nongthymmai Sports Club ka la rah ïa ka khusnam ryngkat ka song pisa ba T. 50/- hajar tyngka.
Ha kane ka 2nd Football League Tournament 2025, ki kynhun kiba la wan ban ïashimbynta ki don baroh 32 tylli ki kynhun na kylleng ki shnong jong ka Ranikor Civil Sub-Division.
Ïa kane ka lympung ïalehkai la wan ban pynhap pyrda noh da u Bah Pius Marweiñ uba dei u MLA jong ka Ranikor Constituency kum u kongsan uba long ruh ha kajuh ka por kum u President jong ka Southern Border Sports Association, ha ryngkat ka jingdon lang u Bah Narayan Thongni, Secretary ka Southern Border Sports Association lem bad kiwei kiwei.