Jowai, Nohprah 14 : Ka Dorbar ki Soo Langdoh kaba la long ha Madan Lariang Ialong, ka dei ka Dorbar katkum ka dustur hikai ñiam hadien ba la dep ban lum ïa u kba u khaw na ki hali pynthor bad mynta ïa kane ka Dorbar la pynlong mynta ka sngi (14/12/2025). Ha kane ka Dorbar la wan ïashim bynta da ki Nongïalam ñiam jong ki Soo Raij-Soo Langdoh hapoh ka jingïalam jong ki Saw Seiñraij ba kynthup ïa ka Seiñraij Jowai, Seiñraij Tuber, Seiñraij Chyrmang bad ka Seiñraij Ialong.
Ïa ka Dorbar la pynïaid da u Pator ka Elaka Jowai u waheh Raymond Nartiang, uba la ai ki kyntien lamphang bad ki kyntien pdiang burom. Nangta la ïoh ïa ka jingïakren ïakhana jong ki Soo Langdoh na ka bynta ban pynlong ïa ki Chad Ñiam Behdieñkhlam 2026 hapoh kine ki Raij.
La pyntip da ka Dorbar ba ha Raij Chyrmang ka sngi ban pynkut ïa ka Chad Ñiam Behdieñkhlam jong ka, kan long haka 26 tarik April, ha Raij Jowai ha ka 9 tarik July, ha Raij Tuber ha ka 17 tarik July katba ka Raij Ialong kan pynkut ha ka 10 tarik August 2026.
Shuh shuh ha kane ka Dorbar la ïoh ïa ka jingsneng kyntu na ki rangbah jong ka Soo Raij-Soo Langdoh ban wanrah ïa ka mynsiem jinglong kawei, ka jingsngewïajan bad ka jingkyrsiew bad ai mynsiem. La ïoh ïa ka jingkren na u ma O.H. Toi, President Seiñraij Jwai, ma Pyrkhat Shylla, President Seiñraij Ialong, ma Helping Phawa, President Seiñraij Tuber, ma Bichar Talang, Tymmen Raij Talang, Seiñraij Kongwasan Chyrmang bad na u ma Puramon Kynjing, Dolloi Elaka Jowai kum u khlieh ka ñiam khlieh ka Elaka.
Katkum ka nongrim hikai ñiam ha kane ka Dorbar hapoh ka jingïalam jong u Pa Dolloi ryngkat bad ki Soo Langdoh bad ki Wasan kila pyndep ïa ka suit ka shor bad ka nguhblei nguhsyiem na ka bynta ban biang ka kam niam, kam raij, kam shnong ha ki por bad ki sngi kiba shakhmat.
La pynshit pynsyaid shuh shuh ïa kane ka Dorbar da ka jingshad sur tynrai ba la shim bynta da ki khun ka Seiñraij Chyrmang, Seiñraij Jowai, Seiñraij Ialong bad ka Seiñraij Iongnoh.
Ha kane ka Dorbar Ñiam ki Soo Langdoh ha Madan Lariang Ialong, kala ïoh ban pynskhem ïa ki nongkitkam jong kane ka Dorbar na ka bynta ka samoi ba 3 (Lai) snem.
Ki nongkitkam ki kynthup ïa u Raymon Nartiang, Pator Elaka Jowai (Chairman), Hoping Bang, Kongwasan Raij Chyrmang (Secretary), Samboon Siangbood, Langdoh Raij Jowai (Vice-Chairman), Starly Lyngdoh, Langdoh Raij Ialong (Treasurer), Arwotki Sumer, General Secretary Seiñraij Jowai (Convener Auditorial Board), Abul Phawa, Vice-President Seiñraij Tuber, Pyrkhat Shylla, President Seiñraij Ialong bad u Kerlang Lakiang, General Secretary Seiñraij Chyrmang kum ki dkhot iong ka Auditorial Board.
Katba ki dkhot jong ka shongpyrkhat kam ka Dorbar Ñiam kin kynthup ïa baroh ki Wasan, ki kñi jong ki Phra Kur Phra Kmai Raij Jwai, ki tymmen Raij/Tymmen Papiah/waheh kur na ki Soo Langdoh/ ki President Secretary jong u Kongwasan Seiñraij Chyrmang, Seiñraij Jowai, Seiñraij Tuber, Seiñraij Ialong, Seiñraj, Ummulong wa ka Seiñraij Shillong.
