Bunkam u Conrad ban leit sha ki constituency ha jaka ban pynleit jingmut ha ka synshar khadar : VPP

Shillong, Nohprah 12: U President ka VPP u Bah Ardent Basaiawmoit ha ka sngi Thohdieng u la pynpaw ka jingsngewkhia haba ïadei bad ka jinglong jingman jong ka saiñ pyrthei ha ka jylla, da kaba ong ba ka sorkar jylla ka la bun kam ha ka ban pynkhreh na ka bynta ka elekshon 2028 da kaba ai daw ba ki dei ki kam shakri na ka bynta jong ki paidbah.
“U Myntri Rangbah uba dei ban pynleit jingmut ha ki kam synshar khaddar, u la bunkam ban leit jngoh ïa ki constituency ban kyntiew shalor ïa la ki kyrtong lajong na ka bynta ki elekshon ban wan,” u la ong.
U Bah Basaiawmoit u la kam ba ka VPP ka la pyrshang ban ïakynduh ïa u Myntri Rangbah la bunsien, hynrei ki jingpyrshang jong ki la long lehnohei, ha kaba la shu ïoh ban aiti ïa ki dorkhas tang ha ki ophisar ha ka jaka ban ïoh aiti ha u Myntri Rangbah.
“Kane ka pyni ïa ka jingbym sngew shngaiñ ka sorkar pyrshah ïa ka Voice of the People Party,” u la kynnoh.
U la kynnoh ïa ka party kaba don ha ka bor synshar ba ka la pynsaphriang ïa ki jingtip ba bakla shaphang ka VPP, da kaba kynnoh ba ka dei ka party kaba ïashah khristan. U Bah Basaiawmoit u la buh ka jingkylli ïa ka seng kaba don ha ka bor synshar bad ïa ki jingthmu jong ka, da kaba kylli la ki donkam ka jingkyrshan jong ki khristan ba bun paid ban jop ha ki elekshon.
“Ka VPP ka kyntiew ïa ka jingïalong kawei bad ka kyntu ïa ki paidbah ba kin buh sharud ïa ka niam bad ka jingïapher ha ka kynhun jaitbynriew, hynrei ka seng kaba synshar ïa ka sorkar ka pyrshang ban phiah ïa ki paidbah,” u la ong.
U Bah Basaiawmoit u la kyntu ïa ki paidbah ban kyntait ïa ka bor kaba wanrah ka jingïapait ïapra bad ba kim dei ban vote ïa kito kiba la buh shwa ïa ka bor hakhmat ban ïa ka bha ka miat jong ki paidbah.