Pynjlan ka MePDCL ïa ka OTS sha ki nongpyndonkam bording kynthups 3 tylli ki shnong

Shillong, Nohprah 12: Ka Meghalaya Power Distribution Corporation Limited (MePDCL) ka la pynjlan ïa ka One-Time Settlement Scheme (OTS) 2025-26 jong ka sha ki nongpyndonkam bording ha ki thaiñ ba jusam ïa ka bording, ba kynthup ïa ka Mawsynram, Phultan, bad Nongalbibra, tat haduh ka 31 tarik u Nohprah, 2025.
Ïa kane ka scheme, ha kaba sdang la pynbna ha ka 15 tarik u Nailar, 2025, kaba thmu ban pynïoh ïa ka lad na ka bynta ki nongpyndonkam bording ban pynbeit ïa ka bill ba dang dei ban siew. Ka OTS kan treikam haba ïadei bad ka jinglum ïa ki bill kaba haduh ka 11 tarik u Risaw, 2025, bad kaba khlem don kano kano ka jingpynkylla ïa ki kyndon kiba la dep don.
Ïa ki Distribution Franchisee operator la dep ban bthah ba kin pynbna ïa kane ka scheme khnang ban pynthikna ba ki consumer ne nongpyndonkam bording kin sngewthuh ïa kine ki jingmyntoi. Ka MePDCL kan pynshisha bad kan pynbeit ïa ka bill kaba dang sah badei ban siew bad baroh ki jingsiew ba la lum hapoh kane ka scheme yn phah sha ka MePDCL.