Shillong, Nohprah 09: Ka aïom ïalehkai phutbol jong ka Shillong Sports Association mynta u snem 2025 kan poi sha kaba kut mynta ka sngi Saitjaiñ (13 tarik Nohprah, 2025) da ka jingïalehkai phainal kaba la ap khmihlynti bha hapdeng ka Shillong Lajong FC pyrshah ïa ka Nongkseh SC.
Kane ka jingïalehkai kan sdang ha ka por 4:30 baje janmiet, ha madan First Ground-SSA Stadium, Polo, kaba kine ki arliang mamla, ka Lajong bad ka Nongkseh kin ïaknieh ïa ka burom ban long lahduh kaba nyngkong eh ha ka SSA Champions Cup 2025.
Ka Nongkseh bad ka Lajong kim pat shym la mad ïa ka jingshah rem ha kano kano ka jingïakhun ha ki lympung ba la pynlong da ka Shillong Sports Association mynta u snem, hynrei namar ba ka dei ka final, kawei napdeng kine kan hap ban mad ïa ka nam rem katba kawei pat ïa ka jingjop.
Haba phaidien, kine ki ar liang ki la dep ban ïakynduh teng ha kane ka lympung, namar baroh ar ki la shah thup ha ka Group B, bad katei ka jingïakhun ka la kut noh ha ka jingïakhaid da mar 1-1. Ka jingïakynduh kaba nyngkong jong ki ka la khring ïa bun ngut ki nongpeitkai kiba la pyndap bad pynshongshit ïa ka madan First Ground ha SSA Stadium ha ka janmiet jong ka 04 tarik u Nohprah, bad la khmihlynti ruh ba ka jingïakhun phainal kan long kumjuh ha ka jingbun ki nongpeitkai.
Haba ïalehkai ha ka kyrdan ba ha khlieh duh jong ka Shillong Premier League, ka Lajong kam shym la lah ban ïada ïa ka nam lahduh ba ka la rah ha u snem 2024 namar ba ka la wan ba ar hadien ka Langsning. Ka la long ka jingïaknieh kaba jan bha – ka SLFC ka la donkam ban jop ha ka jingïalehkai ba khatduh jong ka hynrei ka la ïakhaid khlem thep kol bad ka Nangkiew Irat. Watla ki la pyndep ha ka kyrdan ba ar hynrei kim shym la shah rem ha ki 9 tylli ki jingïalehkai jong ka SPL 2025, da kaba jop san sien bad ïakhaid saw sien. Ka Lajong ka la ïoh katto katne ka jingpyntngen da kaba rah ïa ka SSA Super Cup kaba thymmai.
Ha ka Champions Cup ka la jop lai tylli ki jingïalehkai ha ka Group B, da kaba ïakhaid tang kawei pyrshah ïa ka Nongkseh. Nangta ka SLFC ka la jop suk ïa ka semifinal jong ka da 2-0 pyrshah ïa ka Meghalaya Police ha ka sngi Balang. Kane ka la pynjlan ïa ka jingïalehkai ba khlem shah rem sha ka 16 sien, haba kheiñ lang naduh ka SPL ha u bnai Nailar.
Lah ban ong ba ka la long kumjuh ka jingïalehkai na ka bynta ka Nongkseh. Haba ïalehkai ha ka First Division, ki la jop ha baroh 9 tylli ki jingïalehkai ban ïoh rah ïa ka nam lahduh bad ban kiew sha ka SPL ha ka samoi ban wan, da kaba shah thep tang ar kol hapdeng kine ki jingïakhun. Ka Super Cup ka dei tang na ka bynta ki kynhun jong ka SPL, kumta ka Nongkseh kam shym la ïoh ïa ka lad ban pyrshah ïalade ha katei ka lympung.
Ha ka Champions Cup ki la jop lai sien bad ïakhaid kawei ka jingïalehkai group stage. Hynrei dei ka jingïalehkai semifinal pyrshah ïa ka Langsning ha ka sngi Ba-ar kaba la long ka jingtynjuh kaba jur bha ïa ka kynhun. Ka lahduh jong ka SPL ka la pynkyndit, da kaba thep ar tylli ki kol hapoh 20 minit. Hynrei ka Nongkseh ka la lah ban pynïakhaid da ar tylli ki kol hapoh ka minit kaba 30 shuwa ba kan khur ïa ka jingjop da 4-3 ha ka tie breaker.
Lah ban kdew ba ka Nongkseh ka la lum lang ïa ki nongïalehkai ba kynsai ha kane ka samoi, kiba bun na ki kidei kiba la shemphang bad ïalehkai ha ka I-League. Ki don shibun ki kyrteng hynrei kiba kham paw ki long u Chesterpaul Lyngdoh, u Kynsaibor Lhuid, u Kitboklang Pale bad u Hardy Cliff Nongbri kin long kiba kongsan ha khmat bad ha pdeng madan. Kumjuh na ka liang jong ka Lajong ka don ïa u Mebankhraw Wahlang, u Banpynkhrawnam Nongkhlaw bad u Banskhemlang Mawlong.
Ha ka jingïalang bad ki lad pathai khubor shuwa ka jingïalehkai, baroh ar tylli ki kynhun-ba la mihkhmat da u Wilbert bad u manager u Lekini Suting na Lajong bad u Hardy Cliff bad u coach u Richard Nongneng na Nongkseh, ki la pynpaw ba kin ïalehkai ïa kajuh ka jait phutbol kaba ki la pynbyrngia ïa ki nongkyrshan ha kine ki khyndiat bnai ba la dep bad ban ïakhun ban ïoh ïa ka nam lahduh.
