Shillong, Nohprah 11 : Bun ki la ïohi ïa ka jingitynnad ka Wah Rymben lyngba ki rynsan social media hynrei ïa kane ka jaka jngohkai pyrthei kaba la pynitynnad bad pynbit pynbiang shuh shuh la plie paidbah ha kane ka sngi Palei da u Symbud Myntri Rangbah ka Jylla, Bah Prestone Tynsong.
Kane ka jaka jngohkai pyrthei kaba don lut naduh ka jingkieng ïaid kaba jrong, nangta ka kshaid bun kyrdan bad ruh ka um kaba khuid bha ka don ha ka shnong Lapang, ka nongrit kaba don kumba 30 kilometer ei ei na Pynursla ha surok ban leit sha Dawki.
Ban poi sha kane ka jaka jngohkai, ki nongwan ki donkam ban ïaid kjat tang kumba 10 minit ei ei na Lapalang bad hiar tang kumba 340 tylli ki mawkyndon ban poi sha jingkieng ïaid kjat. Nangne pat ki lah ban shim da ki lieng ban shangkai pyngad ha katei ka wah kaba ïar bha.
Nalorkane, kaban khring eh ïa ki paidbah kan dei ka jingbun ki dohkha ba harukom kiba ka shnong ka la shim ïa ka sienjam kaba tyngeh bha ban ïada bad pynneh pynsah ïa ki.
Katkum ka jingïathuh da u Rangbah Shnong Bah Clement Khongkliam bad ruh u Assistant Rangbah Shnong Bah Bateihun Massar, ha ka por Lyiur lei lei katei ka jaka ka itynnad bha namar ka kshaid ka noh rymphum. Katba ha ka por Tlang pat u ïathuh ba ki paidbah ki lah ban shong da ka lieng bad poi shaduh ki bynta ba shaneng ha kaba ki lah ban shongkai pyngad halor ki mawsiang kiba heh bad bamja song.
Haba kylli kaei ka daw ba ki slem ban plie paidbah ïa katei ka jaka jngohkai, kitei ki nongïalam shnong ki la ïathuh ba ka daw tynrai hi ka dei namar kim pat lah ban pynbiang ïa ki jingdonkam na ka bynta ki nongwan. “Hynrei mynta pat da ka jingïarap jong u MLA (Bah Prestone) ryngkat ka jingïarap katto katne na ka tnad Tourism,” ki la ong.
Shuh shuh u ïathuh ba kumba long mynta hi, kim pat lah ban pynbiang ïa ki jaka sah hynrei kum ka Society kaba peit ïa katei ka jaka jngohkai ki la pynkhreh bad pynbiang da ki tent na ka bynta kito kiba kwah ban sahmiet.
La ïathuh ruh ba na ka bynta ki nongwan, kaba phylla tam na ka bynta ki nongwankai ka dei ka jingdon jong ki mawsiang kiba heh ha kaba ki paidbah ki lah ban shongkai.
Ha kane ka sngi hadien ba la wai ka jingïalang plie paidbah ïa kane ka jaka jngohkai, na ka liang u Symbud Myntri Rangbah ryngkat ka MDC ka thain, Kong Grace Kharpuri, SDO ka Pynursla Kong E Warjri, BDO Pynursla, Bah Rahbok Tynsong bad kiwei kiwei ki riew rangbah, nalor ki ophisar na ki tnad bapher bapher ki la hiar lang ban leit peit ïa kane ka jaka jngohkai.
Shwa kane, u Symbud Myntri Rangbah haba kren ha ka jingïalang plie paidbah ïa kane ka jaka jngohkai u la ong ba ka Wah Rymben kan dei kawei pat ka jaka jngohkai pyrthei kaban kyntiew bun shah bha ïa ka kam jngohkai pyrthei ha ka thain Riwar Pynursla nalor ka jingdon ki jaka kum ka Wah Umngot, Mawlynnong bad kiwei kiwei.
“Kum ki nongshong shnong phi dei ban long kiba la pynkhreh ban pdiang ïa ki nongwan jngohkai pyrthei namar kane kan kyntiew ïa ka kamai kajih bad ka ïoh ka kot jongphi hi,”u la ong.
Nangta u la ong ruh ba ki paidbah ki lah ban shim ïa ki skim shna Homestay ba ka sorkar ka tyrwa kaba long 70 persen ka subsidy bad 30 persen ka loan na ka bynta ban shna ïa ki jaka sah kiba biang bad kiba paka na ka bynta ki nongwan jngohkai.
U Symbud Myntri Rangbah u la ong ruh ba ynda la dep lei lei ka surokbah na Shillong sha Dawki katei ka thain kan dei kawei na ki jaka jngohkai pyrthei kaban khring bun bha ki nongwan kai bad kane kan long ka kabu ksiar ïa ki nongshong shnong ban pynheh shuh shuh ïa ka kamai kajih.
Lah ban kdew hangne ba kane ka shnong kaba don kumba 300 tam ki longiing kadei ka shnong kaba bun ki dei kiba la nang la stad bad ha kajuh ka por kiba khlain bha ha ka rep ka riang khamtam u kwai u soh, sohmrit khlaw bad kiwei kiwei ki soh nalor ba kadei ka shnong kaba bat bha ïa ka jingkhuid jingsuba ha shnong ha thaw.
