Ka Public Hearing jong ka Shree Cement kan ïaid beit shakhmat ong u Member Secretary ka MSPCB

Shillong, Nohprah 11: U Member Secretary ka Meghalaya State Pollution Control Board (MSPCB) u Dr GH Chyrmang u la pynthikna baka Public Hearing naka bynta ka Shree Cement Integrated Cement Plant ha Daistong East Jaintia Hills kan ïaid beit kumba ka buh ïaka tarik.
Lah ban kdew ba ka Public Hearing naka bynta ka Shree Cement Integrated Cement Plant ha Daistong la buh ban pynlong haka 19 tarik Nohprah 2025.
Haba kren shaki lad pathai khubor u Dr GH Chyrmang u la ong ba barabor ïaki Public Hearing la pynlong katkum ki kyndon jong ka Environment Impact Assessment (EIA) 2006.
U Dr Chyrmang u la ong ba hashuwa ban pynbeit ïa ki tarik ban pynlong Public Hearing, ka MSPCB ka donkam ban ïoh ïaki Term of Reference (ToR) bad hadien bala ïoh ïaki TorR kadei ka kamram jong ka Board ban pynlong ïaka Public Hearing.
U la ong baka MSPCB kam don bynta eiei haba ïadei bad ka jingpyrshah ki nong shong shnong ïaka Public Hearing namar ïaka Public Hearing yn pynlong haka jingiatreilang bad ki bor district.
U Member Secretary u la ong ba ka MSPCB ka lah ban pynsangeh trekam ïaka ToR lane ban pynlong Public Hearing tang lada wan hukum na ïingbishar.
“Ngam don eiei halor ka jingdawa ki nong shong shnong ban pynsangeh ïaka Public Hearing. Ka MSPCB ka don bynta tang ban khmih halor ka jingdonkam jong ka EIA. Ngin ïaid skhmat ban pynlong ïaka Public Hearing” u la ong.