Ba pyntrei kam ïa ka scheme RDSS, yn dang bteng ka jingpynlip bording ha Shillong bad Tura :CM

Shillong, Nohprah 11: Ka sorkar jylla kala pyntip sha ki paidbah ba ka jingpynlip bording ba la pynbeit ryntih ka dang ïaid na ka bynta ka sor Shillong bad ruh ha sor Tura namar ka jingpyntrei kam ia ka Revamped Distribution Sector Scheme (RDSS).
Ka RDSS ka kynthup ïa ka jingpyndait thymmai ïa 2600 tylli ki transformer, ka jingbujli ïa 3,800 km ki wire kiba la rim, bad ka jingpynieng ïa ki lain thymmai kiba kot kumba 4300 km. Ïa kane ka projek ka kot haduh 900 klur, la pyntreikam ïa kane ban pynthikna ïa ka jingpynbiang bording kaba janai na ka bynta ki paidbah ka jylla Meghalaya.
U Myntri Rangbah ka jylla u Conrad K Sangma u la pyntikna sha ki paidbah ka jylla ba ka jingpyrshang ban kham pyn duna ïa ka jingeh ba ki paidbah ki ïa kynduh na ka jingpynlip bording. Ka sorkar ka ïa trei lang ryngkat ryngkat bad ka MeECL bad ka tnad bording jong ka jylla ban pynbha bad ban pyntikna ha ka por kaba biang sha ki paidbah.
“Ngi sngewthuh ba kane ka jingpynlip bording ka lah wanrah ïa ka jingeh ïa ki paidbah, hynrei ka long kaba donkam pat ban kynjoh sha ka thong ban ïoh ïa ka bording kaba paka na ka bynta ki paidbah ka jylla Meghalaya,” ong u Myntri Rangbah u Conrad K Sangma.
Ka sorkar ka ai khublei ïa ka jingïatreilang bad jingïaishah jong ki paidbah ha kum kane ka por bad ka pynthikna sha ki paidbah ba ïa ka jingmyntoi na kane ka projek yn sa ïohi ïa ka jingpynbha jong ka bording ha kine ki sngi ban wan.