Shillong, Nohprah 11: Ki nongtrei ASHA jong ka Jylla hapoh ka shatri Meghalaya ASHA Workers’ Union (MAWU) ha ka sngi Palei ki la byrngem ban sdang ïa ka jingiakhih da kaba sangeh treikam, lada ka Sorkar Jylla kam pynlait mardor ïa ka bai nong jong ki kaba la pynslem mynta la bun ki por.
Na ka liang ki ASHA ki la shim ïa kane rai ha ka jingïalang paidbah kaba la pynlong ha Dorbar Hall Pynthorbah Golflink Shillong, kaba la ïasyllok bad phylliew jingmut halor ka jingslem ban pynlait ïa ka bai nong jong ki.
Haba kren sha ki lad pathai khubor ka President ka MAWU Kong Mira June Marsing ka la ong ba ki nongtrei ASHA kin ap haduh 19 tarik Nohprah ïa ka Sorkar Jylla ba ka dei ban pynlait ïa ka bai nong jong ki.
Shuh shuh ka Kong Mira ka la ong ba ki nongtrei ASHA ha rilum Khasi-Jaiñtia kim pat ïoh ka bai nong kaba dei ka bhah na ka Sorkar Pdeng naduh u bnai Jymmang, katba ki nongtrei ASHA ha rilum Garo kim ïoh ïa ka bai nong mynta la shi snem tam.
Na ka liang jong ka, ka la kubur ba ka Sorkar Jylla ka pynlait hok ïa ka bai nong jong ki nongtrei ASHA hynrei kaba sahkut mynta kadei ka bai nong na ka bhah jong ka Sorkar Pdeng.
Ka la ong, “Ha ka jingshisha ngi la ai por haduh 15 tarik Naiwieng 2025 ïa u Mission Director ka National Health Mission ban pynlait noh ïa ka bai nong hynrei u Director u la pan por bad mynta ngi la rai ban ap tang haduh 19 tarik Nohprah ban pynlait ïa ka pisa bad lada ka Sorkar kam lah ban leh eiei, ngim banse ban ïakhih da ka ba sangeh treikam noh naduh 19 tarik Nohprah 2025.”
