Ka UDP kan jop palat 30 ngut ha u 2023 bad kan ïalam ïa ka jingsynshar : Metbah

Shillong, Naitung 06 : U President rangbah jong ka United Democratic Party (UDP), Bah Metbah Lyngdoh ha ka sngi Balang u la kob ba ka Party kan jop beit palat 30 ngut ki MLA ha ka elekshon kaban long ha u 2023.
Ïa kane u Bah Metbah ba dei ruh u Lamphang ka Ïing Dorbar Thawaiñ ka Jylla u pynpaw ha ka jingïalang pdiang burom ïa u DHS ba la shongthait Dr. Aman War ban long kum u kyrtong jong ka party na North Shillong Constituency.
“Nga ong ha kane ka por ba ngin ïoh 30 tam ki MLA namar nga ïohi ïa ka jingkyrshan jong ki paidbah ha kylleng ki jaka ba ngi leit bad kane hi ka pynsngew skhem ba ngin poi beit sha ka thong,” u la ong. Katkum ka jingong jong u, ka party kan pynieng kyrtong kylleng ki bynta jong ka jylla bad wat sha rilum Garo ruh ha u 2023.
Nalorkata, u Bah Metbah u la pyntip ruh ba kin don bun ngut ki MLA na kiwei pat ki party kiban wan ban pynïasoh shen sha ka party ha shwa ka elekshon. “Ha u 2018 ngi jop tang 6 ngut ki MLA hynrei da ka jingjop ha ka elekshon shiteng samoi ngi la don mynta phra ngut,” u la ong da kaba ong ruh ba ha u 2023 hi ka UDP kan ïalam noh ïa ka bor synshar khlem da donkam shuh ban sdien.
Ha kane ka sngi, u Bah Metbah u la kyntu ruh ïa ki nongtrei party ba kim dei shuh ban khein sting nangne shakhmat hynrei ban trei beit khlem sangeh tad haduh ban da poi ka elekshon khnang ba kin ïoh ban poi sha ka jingjop.
Da kaba ïaroh ïa ka jingnohsynñiang jong u Dr. Aman War kum u Director ka tnad ka Koit ka Khiah khamtam ha kito ki snem ba jur ka jingïakhun ïa ka khlam COVID, u Bah Metbah u ong ruh ba ki donbok pat mynta ba ka party ka ïoh ïa kum kitei ki riewshemphang ban ïa tynrong lang ïa ka party ha kiba bun ki liang.
Na ka liang u Dr. Aman pat haba kren ha ka jingïalang u la ong ba u kmen haduh katta katta ba da ki nongïalam ba rangbah jongka party ki wan ban pdiang sngewbha ïa u bad pynbna ruh ban long kum u kyrtong ka party ha u 2023.
U ong ruh ba watla u la shongthait na ka kam ha ka 30tarik u Jylliew hynrei ha ka 01tarik Naitung pat u khlem shongthait shuh namar u ïaid kylleng kylleng ki jaka ban bteng pat sa kawei ka kam.
“Watla nga don 58 snem ka rta bun ki ong ba la jan kut ka rta, hynrei nga pat nga sngew ba nga dang sngew samla kum ba nga dang 27 – 28 snem. Ki 34 snem ba nga don ka jingtbit ha ka kam bad kumta kane ka jingtbit ba ngi don lang ngin wanrah ka synshar kaba paka,” u la bynrap shuh shuh.
Ha kane ka jingïalang la donlang ruh ki MLA kynthup naduh u Bah Kyrmen Shylla President UDP Youth Wing bad Myntri Sorkar ka Jylla, nangta Bah Balajied Synrem, Bah Eugene Lyngdoh, President k a UDP East Khasi Hills Bah Titos W Chyne, General Secretary ka Party Dr. Jemino Mawthoh, Working President Bah Paul Lyngdoh, Vice President Bah Allantry Dkhar. La donlang ruh naduh ki MDC ka party kynthup naduh u Bah Mitchel Wankhar kumjuh ruh u Bah Balajied Rani, President Women’s Wing Kong Pretty Kharpyngrope bad kiwei kiwei ki nongïalam.