Shoh bad jrong kti ki Pulit bad u nongkhaïi dewïong tuh ïa ka longkmie ha Thanat

Shillong, Naitung 6 : Kawei ka longkmie na ri lum Garo ka la shah shoh shah bom haduh ban da jngem lut ka met ka phad, ki lybong bad ki kti ha ki pulit jongka Dudhnoi Police Station ryngkat bad uwei u nongkhaïi u Dhrubananda Choudhory tang namar ba une u nongkhaïi dewiong tuh u kynnoh ba u kurim jongka u khlem leit ai ka pisa 95 hajar tyngka sha ki briew ba u phah ai sha Nonggolpara, Dainadubi.Ym tang ba ki shoh ki bom pynmynsaw ki ktah kti bad jrongkti ruh ïa ka hapoh ka police station.
Kane ka jingjia ka la jia ha 4 tarik mynta u bnai ha katei ka police station. Kat kum ka ejahar ba la ujor da kane ka longkmie bad u kurim jongka la pynpaw ba ha ka 4 tarik mynta u bnai ki pulit jongka Dudhnoi Police Station ki la khot ïa ka bad ïa u kurim jongka ba kin ïawan sha Police Station. Kumta baroh arngut ki la ïaleit bad ki la ïapoi ha ka por 2 baje ei ei bad ki la kylli balei ba ki phah wan ïa ki sha Police Station. Ki pulit ki la ïathuh ba ha ka 25 tarik Jylliew 2022 u Dhrubananda Choudhory uba dei na Bichilaral Path, Goalpara u la ujor ejahar ba ha ka 24 tarik u la phah ïa ka pisa 95 hajar tyngka sha u kurim jongka ban leit ai sha Dainadubi ban pynpoi ïa u dewiong sha u kumba 29-30 ton ei ei hynrei u khlem leit ai ïa ka pisa.
Ha katei ka por ba kine ki shitnga ki poi ha katei ka Police Station u Choudhory u la don lypa bad ma u lem bad ki pulit ki la phah ba ki dei ban siew mar mar 20 lak tyngka ha poh Police Station. Hynrei kin lah shaei ban siew haduh kattei kumta ki la ïathuh ba ki don tang 50 hajar ha pla bad kan ai lada ki donkam. Mar kumta ki pulit lem bad utei u Choudhory ki la bom la tied ïa ki da ki lathi na kjat bad kti. Nangta ki la phah soi jubor ïaki ha ka kotsada bym don jingthoh bad knieh ruh ïa katei ka 50 hajar tyngka ka pisa jongki.
Hadien katto katne por ki la phah ïa u kurim jongka ban leit wad ram bad siew ïa katei ka 20 lak tyngka bad ïa ka pat ki set hapoh police station ha ka por 3 baje ei ei janmiet. Haba u kurim jongka um pat wanphai sha Police Station kawei ka pulit langrut ka Mamta Joshi lem bad kiwei ki pulit ki la shim beit da ki dieng lathi, ki wire cable bad ki la shoh la sympat bad jrong kti ïa ka hapoh ka police station bad kynthei bad shynrang. Kumta ha kane ka jingshah leh kane ka longkmie ka la mynsaw jur. U SI Bishnu Newar lem bad kiwei ki pulit ki la set beaiñ ïaka hapoh police station khlem kino kino ki daw khamtam kane ka jingtied bad jingbom haduh ban da mynsaw jur. Ka la phla ba ki la jrongkti ruh ïa ka na ki bynta ba kyrpang ka jinglong kynthei jongka.
Kumta halor kane ka la leit ai da ka jingthoh sha u DC bad SP jongka Goalpara District, ha ka 5 tarik bad dawa ba dei ban pynshitom ïa utei u Choudhory bad ki pulit kiba la donkti ban tied ban bom bad ban jrongkti ïa ka kat kum ki kyndon aiñ ba pyrkhing bha.
Na ka liang ki paid nongshong shnong ka Dainadubi ruh ki la pynrem jur ïa kane ka jingleh tohmet jong ki pulit ïa kane ka longkmie bad ki dawa ba dei ban pynshitom ïa kitei ki pulit bad u Chodhory kiba ïadon kti bad leh ïakatei ka kam runar ïa ka.