Shillong, Naitung, 06: Ka United Democratic Party (UDP) bad ka Hills State Peoples Democratic Party (HSPDP) kiba ïatreilang hapoh ka lama jong ka Regional Democratic Alliance (RDA) mynta ka kynti ki la rai ban ym ïatreilang shuh hashwa ka Elekshon 2023, hynrei ka jingïatreilang kan long tang hadien ka Elekshon.
Ha ka jingïalang jong ka RDA kaba la long ha ka sngi Balang ha kaba la ïadon lang u President ka UDP u Bah Metbah Lyngdoh bad u President ka HSPDP u Bah KP Pangniang, u Secretary ka RDA u Bah Renikton L. Tongkhar u Secretary ka HSPDP u Bah Panborlang Ryntathiang, u Associate Member u Bah Kyrmen Shylla ki la shim ïa ka rai ban dang pynneh ïa ka Regional Democratic Alliance (RDA) kaba la pynkha ha u snem 2018 naduh ka por ba u Dr. Donkupar Roy (bam kwai ha dwar U Blei) bad u Bah Ardent M. Basaïawmoit.
“Ha kane ka jingïalang, ngi la ïakren sani bad ka rai kaba shai ka long ba ka UDP bad ka HSPDP kin dang pynneh ïa ka Regional Democratic Alliance (RDA), tangba, hashwa ka Elekshon sha ka Iingdorbar Thawaiñ ka ban sa long ha u snem 2023 kan ym don shuh ka jingïatreilang kumba long hashwa ka Elekshon ha u snem 2018 hynrei mynta ka kynti, ka jingïatreilang kan long beit hadien ka Elekshon,’ong u President ka HSPDP u Bah KP Pangniang.
Kum ban shu pyntip, ka HSPDP bad ka UDP ki la rai ban ym ïatreilang shuh ha ka Elekshon MDC 2019 watla ki dang kwah ban pynsah mynsiem ïa ka RDA.
Haba kylli, u Bah Pangniang u la ïathuh ba ka jingïakren bad pdiang ïa kiwei pat ki Seng Riewlum hapoh ka RDA kan sa long ha ka jingïalang ka ban sa long.
Shuh shuh u la ïathuh ba ka jingïakynduh bad ka jingïakren ha kane ka jingïalang ka long ruh halor ka jingai jingkyrshan ïa ka Draupadi Murmu kaba long ka kyrtong President jong ka Kynhun National Democratic Alliance (NDA) ba la ïalam da ka Bharatiya Janata Party (BJP) kaba bat ïa u lakam synshar ha ka ri India.
“Hadien ba ngi la ïoh pdiang ïa ka shithi na ka BJP lyngba u Bah AL Hek, ngi la shong ïa ka jingïalang jong ka RDA mynta ka sngi ha kaba ngi la pynsngew ïa ka rai ban ai jingkyrshan ïa ka Draupadi Murmu namarba ngi sngewkmen shikatdei eh ba ka Murmu kaba dei na ka jaidbynriew riewlum ritpaid kum ma ngi kan ïoh shong ha ka shuki President baheh tam ha ka ri India,” ong u Bah Pangniang.
Ka Murmu ka la wan iuhkjat ha Meghalaya mynta ka sngi ban pan jingkyrshan na ki MLA bad MP jong kane ka Jylla ban ai jingkyrshan ïa ka ha ka elekshon President ka ban sa long ha ka 8 tarik mynta u bnai.
