Shillong, Naitung 06 : Ka Congress mynta ka la pynkhreh ban wad kyrtong da uwei pat na Mawphlang Constituency hadien ba ki la ïoh jingtip ba u MLA barim jong ka, Bah Kennedy Khyriem u la thmu ban leit pynïasoh noh sha ka National People’s Party, ka party kaba ïalam ïa ka bor synshar ha ka jylla.
U Bah Kennedy dang ha ki khyndiat bnai ba la dep u la ai reng ha ka elekshon shiteng samoi ha Mawphlang na ka tiket Congress tangba u la shah rem noh pat ha u kyrtong ka UDP, Bah Eugene Lyngdoh.
Ïa kane ka jingthmu jong u Bah Kennedy ban phet noh na ka party la pyntikna ruh da ki nongïalam ka Congress bad ruh da ki nongïalam ka NPP.
“Haoid kadei ka jingshisha ba u Bah Kennedy un ïasoh noh sha ka NPP,” ong ki nongïalam NPP ki bym kwah ban pynpaw kyrteng.
Na ka liang ka Congress ruh ha kajuh ka por ki la kubur lang ba ki la ïohsngew ïa katei ka khubor na ki paralok. “Haduh mynta na ka liang u Bah Kennedy um pat pyntip lane ban resaiñ na ka party. Hynrei lada jia ba u Bah Kennedy u mih noh na ka party, ngin ïoh pat da kiwei ki nongïalam,” ong u heh Congress ba dei ruh u MDC ka Mylliem, Bah RV Lyngdoh haba kren bad ki lad pathai khubor.
Shuh shuh la ïathuh ruh ba ka Congress ka la pynkhreh ruh ban pdiang sngewbha ïa uwei u riewrangbah na ka thaiñ Mawphlang ha kane ka sngi Saitjaiñ uba lah ruh ban long u kyrtong lada jia ba u Bah Kennedy u mih noh na ka party.
U Bah RV Lyngdoh u la ïathuh ruh ba ki ïoh jingtip ba katkum ka jingïakren hapdeng u President jong ka Meghalaya Pradesh Congress Committee, Bah Vincent H Pala bad u Bah Kennedy ha kane ka sngi Saitjaiñ, la ong ba na ka liang utei u MLA barim u la kular ba un ïai don beit bad ka party.
“Hynrei mynin pat ngi ïohsngew ba i la leit ban pynïasoh noh sha ka NPP watla shangi im pat ïathuh ïa ka daw ba i leit ban pynïasoh noh sha katei ka party,” la ïathuh shuh shuh utei u MDC ka Mylliem.
