200 snem ki la im la trei dewiong kam long kaba suk ban pynkylla beaiñ shimiet shimiet : CM

Shillong, Nohprah 09: U Myntri Rangbah ka jylla u Conrad K Sangma u la kubur ba ka kam tih dewïong ka dei ka kam kaba kyllaiñ ha ka jylla, da kaba ong ba kam dei ka kam kaba suk ban shu pynbna beaiñ shimiet.
“Nga la ïai ong ïa kane la 100 sien. Artylli ki kam hangne- 2014 bad ha shwa ka 200 snem, ïa ka kam tih dewïong la leh da ka lynti thliew khnai ne tunnel mining da kano kano kaba la khot bad da ki lak ki lak ki longïing ki don bynta ha kane bad kynsan kynsan phi wan ban ong ba kane ka juh ka kam kaba long kaba biang bad long aiñ ha ki 200 snem bad ba naduh lashai kan long noh kaba beaiñ,” ong u Sangma.
U Myntri Rangbah u la banjur ba ka jingwan ka jingkylla kaba kynsan ka la wanrah ka jingkyndit ïa ki paidbah, khamtam kiba tih dewïong, kiba ïa ksaid ban ïaid sha ka jingshisha kaba thymmai. “Ka long shisha kaba kyndit kaba khraw ïa ki paidbah khamtam ki nongtih dewïong. Namar kata ka shim ka por na ka bynta jong ki ban ïaid bad kata ka lynti kaba ka kamai kajih bad ki longïing jong ki, ki long laitluid ha kata kawei ka kam business bad ba ki shaniah beit ha ka.”
U Sangma u la ïada ïa ka jingleh jong ka sorkar da kaba ong ba ki shim ka sien jam kaba heh ban pyntreikam ïa ka jingkhang tih dewïong beaiñ, kynthup ïa ka jingujor ïa ki hajar tylli ki case, ki chargesheet, bad ka jingkhang khyrdep ïa ki par. “Haba don kino kino ki mukotduma bad ba ngi la ïoh ki lad jingtip shaphang ki jingshisha shaphang ka jingtih dewïong beaiñ kaba la jia, ka sorkar ka shim ïa ki sienjam.”
“Ban pynneh ïa ka kamai kajih kaba neh slem, dei ban ai ki paidbah da kiwei pat ki lad. Mynta lada phi kwah ïa kane kawei ka lad ban tih dewïong, phi hap ban shim da ka tih dewïong stad saïan (scientific mining),” u la ong.
“Ka kam ka la ïaid bad ngi la ïohi ki jingkylla na ka tih dewïong thliew khnai sha ka scientific bad ka jingïada ha ka kam tih dewïong, hynrei kan shim ka por namar ki paidbah kin hap pynlut, kin hap im bad leh bun ki kam, ban ïoh jingbit na Delhi, Coal Ministry, CMPDCIL, ka sorkar jylla bad kumta kan shim ïa ka por,” u la bynrap.